GIDID-AN nga mogamit og selpon ug uban pang gadgets ang tanang empleyado sa gobyerno sa Dakbayan sa Mandaue sulod sa oras sa ilang trabaho.
Ang gitugtan lang kadtong nag-maintain og official social media accounts nga gikinahanglan mo-update.
Kining memo gihimo ni Atty. Jamaal Calipayan, city administrator, human adunay nadawat nga pipila ka mga reklamo nga adunay mga empleyado nga magsige og gamit sa ilang mga selpon sa personal, dili lakip sa ilang trabaho.
Sa pakighinabi sa Superbalita Cebu ni Calipayan, niingon siya ang memo alang sa tanang regular, job order, contractual nga empleyado sa gobyerno sa dakbayan sa Mandaue.
Sa mga nadawat nga reklamo ni Calipayan, sagad sa mga pangbuhaton sa mga empleyado mao ang pagduwa og video o mobile games, scroll sa social media, pagtan-aw og mga salida sa oras sa trabaho.
Sigon ni Calipayan nga mamahimo lang mobuhat ang mga empleyado niini kon break nila o human na ang oras sa duty.
Apan, nakasabot sab si Calipayan nga ang matag opisina anaa sab silay mga social media personnel diin ang trabaho nila mao ang pag-update sa ilang mga social media accounts.
Tungod niini, gimandoan ang matag opisina nga ilista ang ilang mga empleyado nga opisyal nga tagdumala sa ilang mga social media accounts.
Gitagaan ni Calipayan ang matag opisina og lima ka adlaw sukad sa pagdawat sa mga memo.
Gibuhat ang maong memo niadtong Enero 21, 2021 apan nahatod kini sa matag opisina niadtong Enero 22, 2021.
Matod ni Calipayan nga ang tumong nila sa paggama niini mao nga dili sila gusto nga makultura sa mga empleyado nga kon wala silay buhaton, ilang gamiton ang oras alang sa ilang personal interest.
Giawhag niya ang mga empleyado nga kon mabakante sila gamiton kini nila nga oras nga maghan-ay sa mga gamit sa ilang opisina o bisan unsang trabahuon nga produktibo ilang pagtrabaho.
“During government time, sayang ang oras nga gibayran sa buhis nga gitan-aw ra og Korean drama,” sigon ni Calipayan.
Human sa pag-apod apod sa memo ug anaa gihapoy makalapas niini, matod ni Calipayan nga ang mga empleyado hatagan og tulo ka warning ug sa matag warning hatagan kini og notice to explain.
Human sa tulo ka warning, sigon ni Calipyan, pasakaan nila og kaso ang empleyado ngadto sa Human Resource Management Office (HRMO) alang sa mga regular nga empleyado.