Super Blowout: Gipangayo kang Señor Sto. Niño

SUD sa taas nga katuigan, kanunay nag-ampo ang magtiayon nga Jhon Ric ug Vica Stefany Godinez kang Señor Sto. Niño nga makabaton sila og usa ka anak nga lalake.

Ang una nilang anak kay usa ka babaye. Nag-ampo sila nga usa ka lalake ang ikaduha, apan babaye gihapon.

Ang ikatulo kay usa na ka lalake. Natawo ang bata niadtong Enero 22.

Ginganlan nila ang bata nga si Stefinjhon Godinez.

“Nanganak gyud ko sa buwan sa kapistahan ni Señor Sto. Niño,” paambit ni Vica.

Ang iyang duha ka mga igsuon mao sila si Niña Elaine, 4 ug Olivia Marie, 3.

Niadtong Enero 22, gisaulog nila ang unang birthday ni Stefinjhon sa ilang panimay sa Barangay Guinacot, siyudad sa Danao.

Mga miyembro sa pamilya ug suod nga mga higala ang nitambong sa kasaulogan.

Sa wala pa ang panihapon, nagpa-games una sila alang sa mga bata nga mga bisita.

Apil sa birthday wishes sa mga ginikanan ni Stefinjhon nga kanunay kini nga himsog ug baskug ang lawas, pabilin nga buotan ug paraygon nga bata. (SCG)