HALOS di na makakaon og karneng baboy ang mga ordinaryong molupyo sa Bansalan, Davao del Sur human nga subling misaka ang presyo sa matag kilo niini sa merkado publiko.
Nakurat na lamang si Myrna Alcaria, 42, atol sa iyang pagmalengke kagahapon sa buntag human mipatong na sa P300 ang kilo sa tiyan nga bahin sa baboy gikan sa tag-P250 matag kilo.
Epektibo niadtong Sabado, Enero 23, nagpatuman og dugang usbaw ang mga meat vendors sa lungsod gumikan sa matud pa nagnihit na gyud ang suplay niini ug halos di na sila kakita og buhing baboy.
Ang perna anaa na sa tag-P280 ang kilo gikan sa kanhi tag-P240, P230 ang tiil ug maskara, P150 ang sari-sari ug P100 ang tinae.
Sumala ni Nanay Lolita nga taga Barangay Marber, mamalit na lang siya og bali P50 bisan gamay na lang kaayo aron lang adunay masagol sa gulay nga pinakbet.
Daghan sa mga konsumante ang mialma sa padayong pagsaka sa kilo sa baboy karong buwana.
Niadtong buwan sa Disyembre, anaa na sa tag P180 ang kilo sa buhing baboy, apan mas misamot kini'g kamahal gumikan sa daghan ang mga nag-ihaw karong buwana tungod sa mga selebrasyon.
Nanghinaut sab ang publiko nga tutukan sa Department of Trade and Industry ug Department of Agriculture ang maong suliran aron nga di makapatuyang sa presyo ang mga meat vendors. (Orlando B. Dinoy)