GIPANGKUSTODIYA sa kapulisan sa Toril Police Station ang tulo ka mga edarang babaye human nangadakpan atol sa pagronda sa kapulisan samtang gaduwa og tong-its.
Abtik nga mihimo og pagpanubay ang Toril police sa ilang kampanya batok ilegal nga sugal nga moresulta sa pagkasikop sa tulo ka edaran alas 10:20 sa buntag, Enero 23, 2021, didto sa ASC, Crossing Bayabas, Toril Davao City.
Ang nahisgutan mao sila alyas Nila, 58, balo; Anna, 44; ug usa ka Lita, 60, pulos nagpuyo sa Barangay Crossing Bayabas.
Nakumpiska sa ilang posisyon ang usa ka set playing cards ug ang pusta nga P157.
Gikustodiya na ang mga suspek samtang giandam ang kasong pagsupak sa Presidential Decree 1602 batok kanila didto sa korte. (Jeepy P. Compio)