MOLUSAD og imbestigasyon ang Commission on Human Rights (CHR) sa maduguong operasyon sa kapulisan ug militar didto sa Sultan Kudarat, Maguindanao Province sayong kabuntagon niadtong Sabado, Enero 23, 2021.
Sa maong operasyon, napatyan og 13 ka mga tawo samtang laing pito ang nangaangol.
Ang imbestigasyon sa CHR himuon subay sab sa hangyo sa mga pamilya sa napatay.
Usa sa 12 ka mga suspek nga napatay sa operasyon mao si kanhi Limbo Barangay Kapitan Datu Pindatu Adzis Talusan sa nahisgutang lungsod.
Ang napatay sa bahin sa mga awtoridad mao si Police Staff Sergeant Elenel Pido nga sakop sa Philippine National Police-Special Action Force (PNP-SAF).
Nalakip sa mga samaron mao ang duha ka sakop sa Criminal Investigation Group (CIDG) sa Bangsamoro Autonomous Region (BAR), duha sa PNP-SAF, ug ang tulo ka mga sibilyan nga naigo sa saag nga mga bala.
Nasayran gikan kang Police Major Esmail Madin, Field Commander sa CIDG-BAR, nga magsilbi unta sila og warrant of arrest batok kang Talusan didto sa Sitio Torres, Barangay Limbo, inabagan sa mga sakop sa PNP-SAF, Regional Mobile Force Battalion sa PNP ug militar.
Apan pasulod pa lang sa maong lugar, gipabuthan na sila sa mga armadong sakop ni Talusan nga maoy hinungdan sa maduguong engkuwentro.
Tungod kay nakaplastar og maayo ang mga suspek, duha ka mga V-300 armored personnel carriers sa pulis ug sundalo ang gigamit aron lumpagon ang ilang posisyon.
Gikompirma ni Madin nga si Talusan dunay mga kaso nga multiple frustrated murder, robbery with murder, multiple homicide, multiple frustrated homicide, illegal possession of firearms ug carnapping.
Gitudlo sab sa mga awtoridad nga ang grupo ni Talusan maoy suspek sa pagpatay sa daghang off-duty nga sundalo ug pulis nga moagi sa Sultan Kudarat.
Gawas sa mga narekober nga patay nga lawas sa mga suspek, nakuha sab sa ilang posisyon ang unom ka M16 Armalite rifles, usa ka M14 rifle, duha ka kalibre .45 nga pistola, usa ka improvised Barret, usa ka PAL-automatic rifle, usa ka caliber .22 rifle, mga bala ug magazines.
Gipatuman karon sa kapulisan ug militar ang "hightened alert" sa maong lungsod.