USA na ka buwan sukad nga nahitabo ang pagdahili sa yuta sa Carmen Pit sa Barangay Biga, dakbayan sa Toledo, apan hangtod karon hanap gihapon ang tsansa nga makit-an pa ang unom ka mga minero nga wa gihapon makita sukad nahitabo ang trahedya.
Sa nalista nga mga biktima, upat niini ang kompirmadong patay.
Apan gibutyag ni Jeremy Gabuya sa Toledo City Disaster Risk Reduction and Management Office (CDRRMO) nga sa kasamtangan nagpadayon pa ang pagpangita sa uban pa nga mga biktima.
Matod ni Gabuya, nga sukad sa gihimong search and rescue ug retrieval operation, wala pa’y bag-ong kalamboan nga gipahibawo ang rescuers nga anaa sa nahitaboan.
“Wala pa mi update ana, pero ang among team tua na didto. Everyday na sila naa ngadto bisan pa sa paghitabo ana naa jud sila,” matod ni Gabuya.
Si Pedro Sepada, kapitan sa Barangay Biga, nagkanayon nga hangtod karon wala pa usab mahibaw-i ang resulta sa imbestigasyon sa kagamhanan ug sa mga eksperto sa Mines and Geosciences Bureau 7 (MGB) sa trahedya.
Dugang niya nga padayon usab nga nasinati ang pagdahili sa yuta sa lugar, hinungdan nga padayon nga namasilong ang moabot og 400 ka mga residente sa evacuation center.
Gisuwayan sa Superbalita Cebu pagkuha og pamahayag sa Toledo City Information Office ug sa Mines and Geosciences Bureau (MGB) apan walay tubag.
Una na nga gipahibawo sa kagamhanan nga nihimo na kini sa tanan nga mga lakang nga posibleng makatultol sa rescuers sa mga biktima.
Sa inisyal nga listahan padayon gihapon nga gipangita sila si Jose Carpentero, Jonwel Herediano, Simeon Laconas, John Paul Resuelo, Renante Sepada ug Alfred Tautho.
Ang trahedya nahitabo niadtong Disyembre 21 sa hapon nga nikalas sa kinabuhi sa mga minero nga nagtrabaho sa nahitaboan sulod sa Carmen Copper Corporation (CCC) sa Toledo. (ANV)