Gipasakaan na og kaso nga murder ang lima ka empleyado sa 180 degrees rehabilitation center sa Barangay Pagsabungan, Mandaue City human usa ka gi-rehab namatay sulod sa maong pacilidad niadtong Enero 7, 2021.
Gipasakaan og kaso mao silang Nolie Darato Dolotina, Limuel Cabodbod Noval, Johane Porgella Cabatingin, Felix Gantuangco Algura Jr., ug si Rommel Lloyd Aradanas Fortich, niadtong Enero 21, 2021.
Ang biktima nga si Julius James Sison, usa ka pasyente sa maong rehab, namatay sulod sa rehab center.
Gidala kini sa Mendero Medical Center apan gideklarang dead on arrival.
Angkon sa maong rehab base sa report nga nadawat sa Consolacion Police Station nga nahulog kini gikan sa ikaduhang andana sa maong rehab.
Apan, nakita sa lawas ni Sison daghan kini og bun-og sa lawas. Gani, nakaangkon sab kini og black eye ug anaa sab kini hiwa sa iyang tiil.
Niadtong miaging semana, nigawas na ang resulta sa autopsy report ni Sison ug migawas kini nga ang cause of death niya, blunt traumatic injury sa tiyan, matod ni PCpl. Glenn Bordalba, assistant investigator sa maong kaso.
Sigon ni Bordalba nga base sa ilang nakita sa lawas ni Sison nga daghan og bun-og ug base sab sa istorya sa ilang witness, gikulata gyud si Sison sa mga suspek.
Matod niya, nakulatahan si Sison tungod nagdala kini og toothbrush nga hait ang tumoy gumikan sa pagbaid.
Gamiton unta ni Sison ang maong toothbrush aron mugawas sa maong rehab.
Gipugngan kini sa lima ka suspek apan miresista kini hinungdan nga nakulatahan si Sison, sigon ni Bordalba.
Walay nakuha nga CCTV footage ang kapulisan gikan sa 180 degrees rehabilitaion center, sigon ni Bordalba nga matod sa tagdumala nga naguba ang ilang CCTV niadto pang Disyembre.
Bisan paman nga sa unang mga adlaw sa pag-imbestigar sa kapulisan wala mikooperar ang rehab center, matod ni Bordalba nga nikooperar na kini ug misuporta sa ilang imbestigasyon hinungdan nga napasaka nila ang kaso batok sa mga suspek.
Gani, matod niya nga suod nga higala ang inahan ni Sison ug ang tag-iya sa maong rehab center. (KFD)