BISAN sa kahigpit tungod sa pandemiya, miabot na sa 51,646 ang ihap sa mga nakaparehistrong botante sa Commission on Election (Comelec) alang sa piniliay sa 2022.
Ang maong mga datus gikan sa Probinsya sa Sugbo, siyudad sa Sugbo, mga dakbayan sa Mandaue ug Lapu-Lapu sukad sa Septiyembre 1, 2020 hangtod na sa Enero 14, 2021.
Kini maoy gipahibawo ni Cebu Provincial Comelec Supervisor Lionel Castillano.
Sa maong datus, may labing daghan nga mga niparehistro gikan sa Probinsya sa Sugbo nga moabot 35,669.
Gisundan kini sa moabot 8,264 sa dakbayan sa Sugbo, 4,711 sa dakbayan sa Mandaue ug 3,002 sa dakbayan sa Lapu-Lapu.
Sigon ni Castillano nga nagpadayon pa ang Comelec offices pagdawat sa applications ug may igong panahon pa nga makaparehistro ilabi na ang mga batan-on sa dili pa ang piniliay sa Mayo 2022.
Alang sa first time voter applicants, gipahinumdoman nga magdala og valid ID.
Kon tinun-an, agdala og student ID ug mo fill-up sa registration form nga mahimo usab ma-download online.
Sa pagseguro nga luwas sa pagtakod sa coronavirus disease (Covid-19), una na nga gipahinumdoman nga kon moduaw sa mga buhatan, kinahanglan nga motuman sa quarantine ug health protocol sama sa pagsul-ob og face mask ug face shield ingon man ang pagdala og kaugalingon nga ballpen. Apan limitado ra ang tawo nga makasulod sa mga buhatan aron pagsiguro nga matuman ang physical distancing. (ANV)