Sugod karon, Lunes, Enero 25, gitahasan na ang mga chief of police sa 11 ka police stations sa Cebu City Police Office (CCPO) nga makig-alayon sa barangay officials diin ang ilang mga lugar nga nalakip sa 40 ka mga barangay nga misaka ang kaso sa coronavirus disease 2019 (Covid-19).
Matod ni Police Lieutenant Colonel Wilbert Parilla, deputy city director for operations sa CCPO, ang barangay officials na ang magbuot kon aduna ba silay himuon nga barangay control points.
Kini aron mapakgang ang pagkuyanap sa virus human nakatala ang siyudad sa Sugbo og dul-an usa ka gatus ka kaso niadtong Sabado Enero 23, 2021.
Kon mouyon ang barangay officials nga ibalik ang pagkontrol sa ilang mga residente nga makagawas pinaagi sa pagpangayo og quarantine pass, ang CCPO andam nga modugang og personnel aron moabag sa mga barangay tanod a control points.
Usa sa gipatutukan ni Parilla ang mga barangay nga nalakip sa top 10 nga adunay labing daghan nga kaso sa Covid-19 nga sa labing dali nga panahon nga masulosyonan kini aron dili na masama sa milabayng tuig nga misulbong pag ayo sa virus.
Gani, sugod karong adlawa aduna nay mga pulis nga magbantay sa sitio uban sa mga barangay tanod nga adunay daghang nagpositibo sa virus.
Dili mahimo nga ang tibuok sitio ang ipaubos sa lockdown sanglit nagkatag, matod pa ang natakbuyan sa Covid-19.
Pasabot niya nga ang labing nasayod sa iyang lugar mao ang barangay officials sa pagsanta sa virus. (AYB)