GIPALAMBO karon sa Philippine National Police (PNP) ang cybersecurity awareness ug ang kapabilidad hinungdan nga ang Police Regional Office (PRO) 7 mibukas sa ilang Regional Information and Communication Technology Management Division kun R10.
Ang pagbukas sa bag-ong unit sa PRO-7 gipangulohan kini sa kanhi PRO-7 director Police Brigadier General Albert Ignatius Ferro nga mao na karon ang hepe sa Directorate for Information and Communication Technology Management sa kampo Crame.
Matod ni Ferro, gitahasan siya sa chief PNP pagbukas sa maong buhatan sanglit gikihanglan kini ning panahuna.
“I was tasked to establish this (R10). It is the decision by the higher headquarters in consonance by the desire of the Department of Information and Communication Technology under Secretary (Gringo) Honasan to harmonize the ICT program for the whole government sector,” matod ni Ferro.
Dugang ni Ferro nga ang pagtukod sa R10 pinasikad sa National Police Commission (Napolcom) resolution aron matubag ang duha ka panginahanglan.
Kini mao ang pag-implementar sa data privacy law ug ang cyber security management nga himuon sa nagkadaiyang police units lukop nasod.
Matod ni Ferro, nga ang 17 ka police regional office sa PNP aduna usab silay R10 nga buhatan nga haom kini sa ilang digital transformation program.
Pasabot niya nga sa dihang siya pa ang hepe sa PRO 7, dako matod pa og natabang ang digital technology sa pag-ubos sa kaso sa Covid-19 sa tibuok rehiyon 7 tungod sa contact tracing nga gipaagi sa online.
Mao usab kini ang gihimo ni Police Brigadier General Ronnie Montejo sa Quezon City Police District diin nakita niya unsa ka mahinungdanon ang technology.
Dugang ni Ferro nga ang R10 aduna kini 21 ka personnel, walo niini police official unom ang non-commissioned officer ug pito ka non-uniformed personnel nga ilang gisunod nunot sa lagda sa Napolcom resolution.
Mangulo sa R10 mao si Police Lieutenant Colonel Jeffrey Caballes uban sa mga sakop niini nga adunay kasinatian ug nabansay na sa information technology. (AYB)