SUPERBALITA CEBU

Biker nadumbolan, tipi

NADARO: Si Jose Romilo Blanco, hingkod ang panuigon, minyo, ug taga Sitio Lote, Barangay South Poblacion, dakbayan sa Naga, nadaro human nadumbolan sa pick-up nga sakyanan sa national highway sa Barangay Colon, dakbayan sa Naga niadtong Dominggo, Enero 24 sa alas 4:05 sa kaadlawon. Ang biktima gideklarar nga dead-on-arrival (DOA) sa tambalanan sa Naga. / Gikan sa kapulisan sa Naga

USA ka biker ang biktima sa hit-and-run sa national highway sa Barangay Colon, dakbayan sa Naga niadtong Dominggo, Enero 24, alas 4:05 sa kaadlawon.

Si Jose Romilo Blanco, hingkod ang panuigon, minyo, laborer ug taga Sitio Lote, Barangay South Poblacion, Naga, gideklarar nga dead-on-arrival (DOA) sa tambalanan sa dakbayan.

Wa pa mailhi sa kapulisan ang nagmaniho sa kolor puti nga pick-up nga sakyanan nga nakaigo sa biktima.

Si Police Staff Sgt. Raymond Romares sa Naga Police Station nga nahinabi sa Superbalita Cebu, nagkanayon nga ang biktima bag-o pa migawas sa ilang panimalay alang sa naandan niini nga magbisiklita matag Dominggo sa kaadlawon.

Nasayran nga nauso ug daghan usab ang magbiseklita sa sayong buntag diin usa na niini ang biktima.

Atol sa hitabo, si Blanco dunay direksiyon padulong sa norte o dapit sa dakbayan sa Talisay samtang naghaguros ang usa ka puti nga pick-up nga sakyanan nagsunod sa biktima.

Apan pag-abot sa nahisgotang dapit, nadumbolan ang biseklita nga gimaneho sabiktima. Nadaro ang biktima og pipila ka metros hinungdan sa grabing kadaot sa ulo ug lawas.

Gikataho nga paspas sab nga misibat ang nagmaniho sa pick-up padulong sa direksiyon sa dakbayan sa Sugbo.

Ang biktima gidala sa Vicente Mendiola Center for Health and Infirmary sa dakbayan sa Naga apan gideklarar nga DOA.

Matod ni Police Staff Sgt. Romares nga ang ilang mga imbestigador mihimo og pag-follow-up aron masuta ang pick-up ug nagmaneho niini.

Dugang sa kapulisan, nakita sa CCTV camera sa dapit ang pagkaigo sa biktima sa maong sakyanan nga paspas mibiya ug kini ang posible nga maggiya sa kapulisan sa pagtultol sa malapasong drayber sa pick-up nga sakyanan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!