MIPAKITA og maayong labok ang Big 3 sa Brooklyn Nets aron pabugnawon ang kainit sa Eastern Conference defending champion Miami Heat, 128-124, sa National Basketball Association (NBA) kagahapon.
Sa unang higayon midungan og init ang tulo ka superstars sa Nets nga si Kevin Durant, Kyrie Irving ug James Harden aron ipakita ang gikahadlokan nga potensiyal sa Big 3 sa Brooklyn.
Mao kini ang unang daog sa tulo ka superstars isip teammates sa Nets.
Si Durant mipupo’g 31 puntos, mitunol og 28 puntos si Irving samtang si Harden mipakita sa iyang all-around game nga adunay 12 puntos, 11 ka assists ug pito ka rebounds.
Si Joe Harris midugang og 23 puntos gikan sa pito ka tres alang sa Brooklyn.
Samtang si Goran Dragic maoy nangulo sa Heat nga adunay 19 puntos.
“It’s not every day you see this collection of guys playing together in NBA history, so we want to take full advantage of that,” matod ni Irving
LAKERS 101, BULLS 90
Padayong nagmangtas ang defending champion Los Angeles Lakers og mikuha sa league-best 13-4 record human nila lupiga ang Chicago Bulls ubos sa season-high 37 puntos ni big man Anthony Davis.
Si Lebron James midugang og 17 puntos ug 11 ka rebounds sa kadaogan sa Lakers, kinsa wala pa makatilaw’g pilde sulod sa siyam ka road games.
Si Zach Lavine maoy nangulo sa Bulls pinaagi sa iyang 21 puntos ug 10 rebounds.
JAZZ 127, WARRIORS 108
Mipabuto og 23 puntos, pito ka rebounds ug unom ka assist si Donovan Mitchell sa Utah Jazz aron ihagsa ang Golden State Warriors.
Gibaraw sa Jazz ang career-night ni Warriors superstar Stephen Curry.
Si Curry mihimog lima ka three-point shots nga maoy nakahatag niya sa overall No. 2 sa three-pointers nga adunay total nga 2,562 sa iyang career.
Naapsan ni Curry si Reggie Miller ug nagkaduol na siya sa numero uno nga si Ray Allen nga adunay 2,973.
Mitapos si Curry nga adunay 24 puntos, pito ka rebounds ug pito ka assist apan pakyas kini paghatag sa daog ngadto sa Warriors.
ROCKETS 133, MAVERICKS 108
Sa pagbiya ni James Harden sa Houston mipakita dayon sa iyang labok si Eric Gordon nga mikulit og season-high 33 puntos aron pangulohan ang Rockets batok sa Dallas Mavericks.
Si DeMarcus Cousins midugang og 28 puntos ug 17 ka rebounds nga maoy iyang pinakanindot nga duwa ubos sa Rockets team.
Nakabalik na sa Rockets si John Wall human sa iyang pahuway sulod sa lima ka duwa tungod sa right knee soreness. Mipupo og pito ka puntos ug walo ka assist si Wall.
Gilubong na ang Dallas human sa tulo ka quarters og nakadesisyon kini nga ipalingkod nalang ang ilang superstar nga si Luka Doncic sa tibuok fourth quarter. Si Doncic mitapos nga adunay 26 puntos. (RSC)