SUPERBALITA CEBU

Toledo City mipakita’g maayong duwa sa PCAP

PAMBATO SA TOLEDO: Ang mga membro sa Toledo City Trojans atol sa ilang press conference niadtong Sabado sa hapon sa dakbayan sa Sugbo. / Hulagway ni Richiel Chavez

PANGANDOY sa mga chess player sa Toledo City nga mas molapad pa ang programa sa chess sa ilang lugar labi na sa grassroots level.

Mao nga sa dihang nahibaw-an nila nga gilunsad ang labing unang professional league sa chess nga mao ang Professional Chess Association of the Philippines (PCAP), wala sila magduha-duha pagsalmot niini.

Gimugna dayon sa chess players ang Toledo City Trojans nga mao ilang gidala nga ngalan sa historic All-Filipino Conference sa PCAP.

Gipangulohan ang maong team sa team owner nga si Engr. Jean Mardee Gacang, team co-owner Atty. Jeah Jean Gacang, team manager Felix Poloyapoy Jr., team captain Bonn Rainauld Tibod ug beterano nga International Master Rico Mascarinas.

Lakip pud sa team mao sila National Masters Rommel Ganzon ug Rogelio Enriquez Jr., Ronald Ganzon, Richard Natividad, Glicerio Pardillo Jr., Bonn Rainauld Tibod, Christopher Tubalado, ug lady players Gacang ug Jinky Catulay.

Matod sa abogadang si Gacang nga ang ilang tinguha sa maong pagbuhat sa team ug pagsalmot sa PCAP mao ang paghimo’g awareness sa Toledo City nga maoy makatabang sa pagkahilig sa chess sa mga batan-on.

Sa ilang unang lima ka duwa sa PCAP mipakita na dayon og labok ang Trojans nga adunay 3-2 win-loss record. Human sa ilang maayong gipakita giisip karon nga usa sa mga lig-on sa South Division ang Toledo City.

Gilupig sa Toledo City ang Cebu City, 13.0-9.0, ug ang Lapu-Lapu City 14.5-6.5 sa ilang unang duwa.

Kagahapon sa gabie, gipilde sa Toledo City ang Surigao City, 12.5-8.5, apan gilupig sila sa Negros Oriental, 9.5-11.5, sa usa ka close game.

“Excited gyud mi aning ligaha kay mao ni ang unang pro league nato,” saysay ni Atty. Gacang, kinsa kanhi varsity player sa chess sa University of Cebu ug nakaduwa sa managlahing kompetisyon sama sa Cebu Schools Athletic Foundation, Inc. ug Private Schools Athletic Association.

Dugang ni Gacang nga ang damgo sa Toledo City mao ang maka-produce og Master chess player.

Batbat ni Gacang nga ang mga torneyo nga sama niini makahatag og determinasyon sa mga batan-ong player nga maningkamot nga molambo ilang duwa.

Tungod sa hulga sa pandemiya, ang PCAP giduwa online pinaagi sa lichess.org.

Matod sa team captain nga si Tibod nga ang ilang tinguha mao ang makasulod sa Top 8 sa maong torneyo.

“Sa South Division naa tay purohan nga makasulod sa Top 8. Usa sa mga lig-on niining division mao ang Negros Oriental, Toledo ug Camarines, “ ingon ni Tibod.

Si team manager nga si Poloyapoy miingon nga adunay silay total nga 23 ka duwa sa elimination round ug ilang gyud kining pangandaman matag duwa.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!