SUPERBALITA CEBU

Barrita: Lockdown sa Guadalupe

Tikdul-Tikdol

GITUGOTAN na ang mga tawo nga nagpangedaron gikan sa 10 ngadto sa 65 anyos nga mogawas sa ilang mga panimalay sugod karong Pebrero 1, basta ang ilang lugar gibutang ubos sa modified general community quarantine (MGCQ).

Si Presidential Spokesperson Harry Roque nipahibawo niadtong Biyernes nga kining maong lakang giaprobahan sa Inter-Agency Task Force for the Management of Emerging Infectious Diseases (IATF-EID).

Subay kini sa rekomendasyon ni Trade Secretary Ramon Lopez aron makabangon ang ekonomiya sa nasod nga ingon sa nalup-og sa mga kurintinas nga gipatuman tungod sa Covid-19 pandemic.

* * *

Apan sa Barangay Guadalupe sa siyudad sa Sugbo, gipatuman ang istrikto nga curfew, stay-at-home order ug “Sunday lockdown” sud sa duha ka semana sugod kagahapon, Enero 24, 2021, alang sa tanan, way edad nga gitahod.

Si Barangay Captain Michael Gacasan niingon nga atol sa duha ka Dominggo nga lockdown, ang maka-operate kadto rang essential establishments. Ang makagawas sa balay kadto rang mga APOR (authorized persons outside residence) ug kadtong dunay importanteng tuyo.

Matod niya, gitumong kini sa pagkontrolar sa pagtakod sa Covid-19. Sa miaging 14 ka adlaw, gikan sa Enero 9 hangtod sa 22, miabot ang natakdan sa Covid-19 sa Guadalupe og 50, ang kinadaghanan sa siyudad, sumala sa Emergency Operations Center (EOC).

* * *

Apan makabuot-buot ba ang mga opisyales sa usa ka barangay sa pagpatuman sa usa ka lockdown? Si Konsehal Joel Garganera, deputy chief implementer sa EOC, niklaro nga igo lang giistrikto sa mga opisyales sa Guadalupe ang pagpatuman sa protocols sa executive order ni Mayor Edgardo Labella.

Matod pa ni Gacasan, mahimo nilang lugwayan ang lockdown kon gikinahanglan ug ilibkas kon mokunhod ang mga kaso sa Covid-19. Ang nakapaalarma nila mao nga nagkatag ang pagtakod sa maong virus sa 27 ka mga sitio, di lang kay sa usa ka balay.

Wa pay lockdown nga gipatuman sa ubang mga barangay nga nakatala og tag-as sab nga mga kaso sa coronavirus sa miaging 14 ka adlaw.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph