SUPERBALITA CEBU

Editoryal: Kadako sa Guadalupe

Editorial Cartoon by Ariel Itumay

ANG Barangay Guadalupe maoy nag-una karon sa mga kaso sa coronavirus disease 2019 (Covid-19) sa dakbayan sa Sugbo. Sukad sa pagbuto sa pandemiya, ang Guadalupe nagbansiwag nga apektadong dapit. Gani, sugod kagahapon, Enero 24, gibalik ang hugot nga pagpatuman sa curfew, stay-at-home order, ug Sunday lockdown o granular lockdown sulod sa duha ka semana.

Si Guadalupe Barangay Captain Michael Gacasan nagkanayon nga ang mga opisyal sa barangay nakaobserbar sa paspas nga pagkaylap sa kaso sa Covid-19 nga hinungdan sa ilang sa mas estrikto nga health protocol.

Ang granular lockdown nagpasabot nga ang gikinahanglan lang nga estabilisemento ang tugotan nga nakaabli sa maong adlaw. Kadtong authorized persons outside residence (Apor) ug dunay importanteng tuyo ang tugotan nga makagawas matag Dominggo.

Nganong mikatap og balik ang virus sa naasoyng barangay? Seguradong daghang hinungdan niini. Dili ba kaha nga ang usa niini mao ang kadako sa Guadalupe? Nag-una sa labing taas nga populasyon sa mga barangay sa dakbayan ug labing dako usab nga lina nga iyang nga gisakopan.

Dunay lakang niadto sa pagsiak sa Sityo Banawa nga giila usab nga labing dako nga sityo sa dakbayan ug gani, dako pa sa ubang barangay sa iyang gidak-on ug posible sa kita usab sa barangay tungod sa kadaghan na sa estabilisemento sa dapit. Wala kini molamppos sa plebisito.

Sa kahimtang sa Covid-19, naglisod kaha ang Guadalupe sa pagkontrolar tungod sa kalapad sa barangay? Naisyu na kaniadto nga hinay ang pag-abot sa serbisyo sa barangay sa mga sityo tungod sa kadako sa dapit. Ang kasarangan nga gidak-on sa barangay ug igong populasyon, sayon ug dali lang sa pagkontrolar.

Maayong matan-aw kini sa mga opisyal sa Guadalupe alang sa ngalan sa kalamboan sa barangay ug dakbayan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph