DUHA sa mga sakop ni kanhi Barangay Limbo Chairman Datu Pindatun Adziz Talusan sa Sultan Kudarat, Maguindanao Province gilutos karon human makaipsot sa gilusad nga law enforcement operation niadtong Sabado, Enero 23, 2021.
Mga nakasibat mao sila si Jajer Mama ug Jason Guiabil.
Mga nahisgutan apil sa mga armadong grupo nga napatay sa operasyon nga sila kanhi kapitan Talusan; Abdullah Talusan; Bembi Talusan; Randy Talusan; Abdul Mubarek Talusan; Khadafi Esran; Ahyot Degan; Abdul Patah Buday; Samsudin Ali; Bulod Adam; Butoh Minandang; ug Sangkupan Minandang.
Kahinumdoman nga magsilbi unta og warrant of arrest batok sa kanhi kapitan ang mga sakop sa Criminal Investigation and Detection Group-Bangsamoro Autonomous Region (CIDG-BAR), uban ang puwersa sa Philipine National Police-Special Action Force (PNP-SAF), BAR-Regional Mobile Force Battalion ug militar didto sa Sitio Torres, Barangay Limbo sa maong lungsod.
Apan gipangrakrakan ang raiding team sa mga armadong sakop sa kanhi kapitan nga maoy hinungdan sa maduguong pana-engkuwentro.
Samtang patay sab si Police Staff Sergeant Elenel Pido nga sakop sa PNP-SAF.
Pito sab ang nasamdan nga naglakip sa duha ka sakop sa CIDG-BAR, duha sa PNP-SAF ug tulo ka mga sibilyan nga naigo sa mga saag nga bala.
Samtang nadakpan ang usa ka Abdul Karim Kaman Usop sa mga pulis nga giingong nagtago sa likod nga bahin sa balay sa kanhi kapitan. (Edgar E. Fuerzas)