NIBATI og kabalaka ang ubang molupyo sa probinsiya sa Davao del Sur takna nga magpabakuna na sila batok coronavirus disease 2019 (Covid-19).
Human gipahibawo sa kagamhanang probinsiyal nga mogahin kini og P100-milyong pundo alang sa pagpamalit og bakuna, nanaghap ang kadaghanan nga obligado silang magpatusok sa maong bakuna.
Atol sa gihimong pagpanubay, adunay miuyon apan aduna sab nanganti nga dili magpabakuna.
Sumala ni Luzviminda, 53, nga taga Barangay Kapatagan, Digos City, nabalaka siya sa mahimong side effects sa bakuna human nabati ang mga balita diha sa radyo ug telebisyon nga adunay namatay sa ubang lugar.
Gitataw sab sa 56-anyos nga si Ramon nga bisan unsa pang matang sa bakuna dili sab siya buot nga matusok niini sa rason nga tagsa ra siyang nagalugsong sa dakbayan ug naa kanunay sa iyang umahan mao nga imposibleng matakbuyan siya sa kagaw.
Sa lungsod sa Bansalan, uyon ang kanhi election officer sa lugar nga si Fred Cutin nga magpabakuna apan iyang gipili ang Sinovac o Sinopharm.
Apan mas daghang indibiduwal ang hugot nga midumili nga magpatusok ugaling moabot na dinhi ang bakuna.
Matud sa laborer nga si Armand, 45, katungod niya nga modumili ugaling tusukan sa maong bakuna sanglit wa siya masayod kon unsay mamahimong epekto niini sa lawas.
Hinuon walay gitakdang multa ang magdumili sa pagpatusok og bakuna apan mas dako ang tsansa nga maluwas gikan sa kagaw ugaling mabakunahan. (Orlando B. Dinoy)