Garcia maoy sunod kontra ni Pacquiao?

Gianunsyo ni World Boxing Council (WBC) interim lightweight champion American Ryan Garcia sa social media nga makigbatok siya kang Filipino boxing icon Manny Pacquiao alang sa sunod niyang away.

Si Garcia, kinsa kapila na nag-ingon nga iyahang idolo si Pacquiao, nipabuhagay sa iyang Instagram account nga ang pagpakig-away sa Pambansang Kamao ng Pilipinas usa ka katumanan sa iyang pangandoy.

“A dream turned reality! It’s an honor to share the ring with Manny Pacquiao I will always respect what you did in and out the ring. Here’s to the best man winning,” mensahe ni Garcia.

Sa iyang labing ulahing away, gisurpresa sa 22 anyos nga si Garcia ang kalibutan sa boksing dihang nakaposte siya og seventh-round technical knockout nga kadaugan batok kang Luke Campbell niadtong Enero 2, 2021 sa American Airlines Center sa Dallas, USA.

Human ning awaya, ang promoter ni Garcia nga si boxing legend Oscar De La Hoya mipadayag nga andam na ang iyang batos nga makigharong batok sa bisan kinsa.

Si Garcia naggunit og dalaygong 21-0, 18KOs nga rekord.

Sa iyang bahin, si Pacquiao, 42, katapusang miaway niadto pang Hulyo, 2019 diin iyang gilupig si American Keith Thurman pinaagi sa split decision aron angkunon ang World Boxing Association (WBA) welterweight.

Wala pa mohatag og komentaryo si Pacquiao kon tinuod ba o dili ang gianunsyo ni Garcia.

Kagahapon, ningbaniog sa nagkadaiyang boxing website nga nagpadayon sa kasamtangan ang panagharong nila ni Garcia ug Pacquiao.

Nigawas kining maong taho human sa kapildihan ni mixed martial arts (MMA) superstar Conor McGregor batok kang Dustin Poirier sa ilang rematch sa main event sa UFC 257.

Sa sayo pa, si McGregor maoy giingong numero uno sa listahan sa posibleng sunod nga makontra ni Pacquiao apan kalit lang kining nalubog human sa kapildihan ni McGregor batok kang Poirier. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph