SUPERBALITA CAGAYAN DE ORO

Eala taas pa og maabot

Taas pa og maabot si Philippine tennis sensation Alex Eala, kinsa mihimo og langas human niya naangkon ang labing una niyang professional title pinaagi sa makapakaging nga kadaugan batok sa beteranong kontra nga si Yvonne Cavalle-Reimers sa host Spain, 5-7, 6-1, 6-2, sa finals sa International Tennis Federation’s (ITF) W15 Manacor tournament Enero 24, 2021 sa Mallorca, Spain.

Mao kini ang gipabuhagay ni Philippine Sports Commission (PSC) Commissioner Ramon Fernandez sa pagpakighinabi sa Superbalita Cebu.

“I congratulate her. As a former athlete, I encouraged her to keep improving. She has proven herself, she’s there already. I knew, taas pa ang iyang maabot,” matod ni Fernandez, kinsa kanhi 4-time MVP sa Philippine Basketball Association (PBA).

Si Eala, kinsa lumad nga taga Quezon City, maoy labing batan-ong partisipante sa edad nga 15 ug pinakaubos og ranking sa torneyo apan wala kini nagpatay-og sa mga tang-an niyang gikaharong sa kompetisyon.

Napilde si Eala sa premirong set apan iyang gimakmak si Cavalle-Reimers sa nagsunod duha ka sets aron ibulsa ang kampiyunato.

Sa kadaugan, nakaangkon og $15,000 nga ganti si Eala, kinsa misagubang sa ikaduha pa lang niyang tuig sa professional circuit gikan sa iyang pagdominar sa juniors scene.

Ning maong kalampusan, gilauman nga mosaka pa ang rankings ni Eala sa ITF junior ug singles.

Ubay-ubay pang dekalidad nga magduduwa ang gipakaging ni Eala sa kompetisyon una sila nakasulod sa finals.

Gisugdan ni Eala ang iyang kampanya sa torneyo pinaagi sa pagbuntog sa sama niyang Rafael Nadal Academy scholar nga si Anna Paradisi sulod sa duha ka sets dayon gisundan kini niya’g laing kadaugan batok kang Seone Mendez sa Australia, kinsa iyaha sab gipukan sulod sab sa duha ka sets.

Sa quarterfinals, gilupig ni Eala si French Carole Monnet sulod sa tulo ka sets samtang sa semifinals, nagkinahanglan lang og duha ka sets si Eala aron lupigon si Adithya Karunaratne sa Hong Kong.

Ubay-ubay pa nga mga torneyo ang salmutan ni Eala karong tuiga alang sa iyang tinguha nga mokatkat pa sa rankings. (ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph