Usa sa mga hot issue karon sa showbiz kining pagsige og tagawtaw ni Johnny Manahan batok sa iyang kanhi estasyon nga ABS-CBN.
Mao kunong nihawa siya tungod sa gihimo sa Pinoy Big Brother nga sila-sila na lay nag-manage sa ilang mga ex-housemates ug wala na mosunod sa protocol nga dapat unta moagi sa Star Magic nga iyang gi-manage.
Apan sa edad ni Manahan nga 73 ug sud sa 40 katuig nga nag-alagad siya sa maong network, dapat mag-enjoy na lang unta siya sa nahibiling mga adlaw sa iyang kinabuhi.
Maayo man sad si Laurenti Dyogi nga mao na karoy head sa Star Magic. Ana man gyud na iya-iyang panahon. Ila na sad ron.
ROQUE NIULBO
Hot topic sad ang nahitabo nilang Harry Roque ug sa TV host nga si Pinky Webb atol sa live interview sa CNN Philippines.
Si Roque nasuko kay mora kunog gipagawas ni Pinky nga obligado siyang mosunod ni UP professor Danilo Arao, kinsa nanawagan ngadto sa mga UP alumni nga dunay taas nga posisyon sa gobyerno nga supakon ang gihimo sa mga militar nga misung sa ilang UP campus.
Apan si Pinky Webb cool lang gihapon samtang sigeg pitik sa iyang buhok. Mao nay giingon pildi lang ang maglagot. Haha.
KAMOY UNA
Hot topic sad sa social media ang bahin sa vaccine batok sa Covid-19.
Klaro nga daghan sa mga Pinoy ang di pa gyud andam magpabakuna kay mahadlok sa posibleng mga side effect. Bitaw, maayo no, iapil ta nila sa ilang trial and error.
Kon duna may dapat magpabakuna kanang mga naa sa posisyon sa kagamhanan nga haruhay nga nabuhi sa buwis sa katawhan mao ni silay nindot sampulan aron makitang katag.
TRENDING
Nag-trending sa Twitter ang unang episode sa Asap niadtong Dominggo sa TV5. Maayo unta magpadayon na ni kay lahi ra gyud ang Asap kumparar sa uban.
Wa sad gyud mamiya ang mga OPM icon nga sama nilang Martin, Gary, Regine, ZsaZsa ug Sarah kay kahibawo man sila nga institusyon na ang ABS-CBN.
Magpasalamat diay ko ni Engr. Dennis Cabahug nga nihatag og hinabang sa atong mga higala nga apektado ang panginabuhian tungod niining pandemya. Si Cabahug usa ka award-winning composer nga tua na nagbase sa Amerika. Daghang salamat, Sir Den.