NIMINOS ang suplay sa karneng baboy sa Dakbayan sa Mandaue karong tuiga, sigon sa Mandaue City Veterinary Office.
Sa pakighinabi sa Superbalita Cebu kang Dr. Karen Merilles, Mandaue City veterinarian, siya niingon nga daghan silag nadawat nga reklamo gikan sa mga tindera nga maglisod na sila og pangita og suplay sa ilang ibaligya nga karneng baboy. Wa pay eksakto nga numero si Merilles kon pila ang pag-us-os sa suplay sa baboy.
“Dili pa ko kaingon kay karon ra man nagsugod sugod og reklamo ang mga tindera. So, dili pa nato ma-determine pero naa gyud siyay drop,” sigon ni Merilles.
Matod ni Merilles nga gitan-aw nila nga hinungdan mao ang pag-us-os sab sa production sa farms tungod kay dako og alkanse gumikan sa pandemya diin ang tanang mga establisemento nga manginahanglan sa ilang supply wa pa nag-full operation.
Usa sab sa gitan-aw nga hinungdan mao ang pag-agi sa holiday season diin taas ang demand sa baboy ug uban pang pork products. Matod ni Merilles nga tungod ang Visayas nalang ang nag-supply og baboy sa Luzon hinungdan nga anaay kompetensya sa supply.
Apan, giklaro ni Merilles nga di pa kini angay kabalak-an tungod kay ang supply sa mga baboy karon igo ra sab sa trend sa demand sa merkado.
Ang Mandaue City magkuha og supply gikan sa Negros Oriental ug probinsya sa Sugbo.
Tungod kay ubos ang supply ug lisod ang pagpangita og supply, matod ni Merilles nga mosaka sab ang presyo sa karneng baboy.
Matod ni Merilles nga ang kanhiay nga presyo sa baboy sa dakbayan anaa alang sa P230 hangtod P250, apan tungod sa ubos nga suplay, anaa na sa P280 hangtod P290.
Sa mga malls ug supermarkets ang presyo sa karneng baboy anaa na sa P300 hangtod P320 matag kilo.