NINAOG ngadto sa 10 na lang ka mga lungsod nga way aktibong kaso sa coronavirus disease sa pagsulod sa 2021.
Kini maoy gipahibaw ni Dr. Christina Giango, pangu sa Integrated Provincial Health Office (Ipho) sa mga tigbalita sa Enero 25.
Subay sa uwahing lista sa Ipho sa Enero 23, nagpabilin nga way aktibong kaso sa Covid-19 ang mga lungsod sa Alcoy, Alegria, Aloguinsan, Boljoon, Oslob, San Francisco, Pilar, Tudela, Tabuelan, ug Tuburan.
Mas ubos kini kon itandi sa 32 ka mga lungsod nga gawasnon sa uwahing sa Disyembre 2020.
Subay sa kasamtangang datos nga gikuptan sa Ipho, adunay 498 ka aktibong mga kaso nga natala o 6.6 percent sa kinatibuk-an nga 7, 586.
Nakatala og 6,652 o 87.8 percent nga recovery ang Probinsya sukad sa pagsulbong sa sakit.
Nagtuo si Giango nga di alarming ang pagsaka sa mga kaso tungod kay base sa pagtuon normal lang ang nakitang pagsulbong.
“Sama sa pandemic nga more sila focus on Covid and usa sad nabantayan sad na sa DOH nga... every three years na siya mosaka. Dili man pod kay distributed to all municipalities man. Sukad nana sa una nga ingun ana na siya nga every three years mosaka... Di man gyud siya ingon daghan pero karon... dili lang pod sila mokompyansa,” matod ni Giango sa Enero 25.
Wa molugak ang kadagkoan sa kalungsoran sa pagpatuman sa mga protocol subay sa nadugang nga bag-ong mga kaso sa kalungsoran.
Ang mga kaso sa Enero 24 niabot og 19 base sa talaan sa Department of Health (DOH).
Miabot ang mga kaso og 7,607 apan, 6,649 na ang naka-recover. Ang Lalawigan sa Sugbo di lang maoy nakasinati og pagsaka sa aktibong mga kaso sa Covid.
Ubang mga dapit sa Sugbo ingon man sa nasod nakasinati usab og pagsaka tungod sa holidays. (ANV)