Ang Barangay Buhisan maoy labing unang barangay sa Dakbayan sa Sugbo nga duna nay libre nga wi-fi alang sa mga lumolupyo labi na sa mga bata sa ilang online classes.
Si Buhisan Barangay Captain Gremar Barete nakahunahuna sa maong programa tungod sa panahon sa pandemiya sa coronavirus disease 2019 (Covid-19).
Matod ni Barete, ang programa namugna uban sa pag-abag sa tsirman sa Sangguniang Kabataan (SK) niadtong Disyembre 2020.
Dugang ni Barete nga ang tsirman sa SK migahin og P50,000 alang ngadto na sa mga pagpalit og mga kahimanan sa pagtaud sa wi-fi.
Si Barte nihatag usab og P50,000 nga iyang personal nga kwarta alang sa maong proyekto.
Anaa sa 20 sa 26 ka mga sityo sa Buhisan ang nakapahimulos na sa libreng wi-fi nga dunay gikusgon nga 50 mbps.
Samtang karong tuiga, target usab ni Barete nga makabaton sila sa mas paspas nga signal nga moabot na sa 500 mbps. Ni-apply sila sa usa ka kompanya sa telekomunikasyon alang sa kusog nga signal.
“Sa pagkakaron libre pa nato na ang wi-fi apan tungod kay mi-apply man ta sa mas kusog nga signal mao na nga migahin ta og P100,000 gikan sa panudlanan sa barangay nga maoy bahinon sa ibayad sa wi-fi matag buwan,” asoy ni Barete sa Superbalita Cebu. (BBT)