Dead-on-arrival (DOA) sa tambalanan ang drayber sa motorsiklo human kini natumba sa national highway sa Sityo Nasipit, Barangay Talamban, Siyudad sa Sugbo niadtong Dominggo, Enero 24, alas 9:00 sa buntag.
Si Joebert Odchugue, 26, lumad nga taga Barangay Valdeconcha, lungsod sa Binuangan, Misamis Oriental ug kasamtangang nagpuyo sa Barangay Carreta, siyudad sa Sugbo.
Si Odchugue, sa iyang pagmaneho sa motorsiklo padulong sa Gov. Cuenco St. sa Sityo Nasipit sa Talamban ug atubangan sa Grid Food Park, giingong nasangit sa wire. Sa iyang pagkasangit, siya nalabay hinungdan nga naligsan sa usa ka sakyanan, subay sa paghulagway sa pipila ka saksi.
Si Police Captain Jonathan Taneo, hepe sa Talamban Police Station 8, nagkanayon nga si Odchugue nga nagmaneho sa Suzuki nga motorsiklo ug ang awto nga nakaligis gimaneho ni Ian Kerstan Smith, 31, molupyo sa usa ka subdivision sa Sitio Nasipit.
Giingong nawad-an sa kontrol si Odchugue sa motorsiklo nga niresulta sa iyang pagkasukamod sa dalan, rason usab nga nalatayan ang iyang lawas sa sakyanan nga gimaneho ni Smith.
Si Odchugue dali nga gidala sa mga niresponde nga medical personnel sa tambalanan gikan sa nahitaboan apan gikabsan na sa kinabuhi sa wa pa moabot sa ospital.
Si Smith natanggong sa selda sa Talamban Police Station 8 atol ning pagsuwat. Mag-atubang siya og kaso nga reckless imprudence resulting to homicide and damage of property, matod ni Taneo.Samtang, wala magkuwang ang Cebu City Government labi na sa pag-atiman sa mga patay nga linya sa kuryente ug cable sa lainlaing suok sa dakbayan.
Kini ang paghulagway ni Councilor Jerry Guardo, kinsa maoy gitahasan kini Mayor Edgardo Labella sa paghan-ay sa mga gubot ug pagkuha sa mga nagbitay nga wires kansang programa gisugdan sa miaging tuig.
Sa unang mga semana sa Enero, ang grupo nga gilangkuban sa mga personnel sa telephone communication companies, cable ug Visayan Electric Company ilang giayo ang nagkagubot nga wire sa rota sa Sinulog labi na sa Barangay Santo Niño ug kanait nga mga lugar.
Si Guardo nangayo og dispensa ngadto sa motorista ug sa pamilya ni Odchugue kinsa nadisgrasya sa Talamban kagahapon.
Adunay personnel nga mo-roving sa mga nagkadaiyang karsada sa siyudad sa panghinaot nga aduna silay spaghetti wires nga makit-an ug mahatagan dayon og solusyon aron kini mahipos. (BBT, PAC)