NGANONG padayon ang tsismis nga seryuso ang kahimtang sa panglawas ni Cebu City Mayor Edgar Labella? Nidiga na man siya unsay iyang sakit.
Niingon na man gud kini nga dunay ear infection mao nga nag-sick leave. Apan dihang nasaag ko kuyog sa mga higalang sakop sa media sa usa ka kan-anan sa miaging Biyernes, naghisgot kini sila nga di katuohan ang maong pamahayag. Moinsister gyud sila nga seryuso kaayo ang sakit sa mayor.
Nanawag sab ang mayor kang Bobby Nalzaro sa iyang programa sa radio. Luya lagi ang tingog. Apan gipanghimakak ang tsismis nga siya nag-coma. Buhi pa intawon siya, matod pa. Apan daw daghan ang wala mituo kaniya.
Ako nang matag-an ang pamahayag sa iyang mga tigsuporta. Ang oposisyon maoy nagpaluyo sa tsismis. Hmmm. Apan kon ang oposisyon man, makatabang ba kanila kon tinuod nga walay seryuso nga sakit si Mayor Labella?
Hinuon, karong iyang gipa-extend ang iyang sick leave, nasiguro ko nga dunay nalipay nga nag-acting mayor. Pero kadiyot ra man sab kay inig human og pahuway sa mayor, mobalik man kini sa City Hall.
Bisan pa man, nganong dunay dili motuo sa pamahayag sa mayor? Duna ba silay nahibaw-an kabahin sa iyang kahimtang?
Alang kanako, ang problema karon ni Mayor Labella mao ang kredibilidad. Kinahanglan siya og mga pruweba nga kining iyang gisulti kabahin sa iyang kahimtang sa panglawas tinuod.
Tingale, inig balik niya sa opisina, dad-on niya ang iyang doktor aron maoy motubag sa mga pangutana sa mga sakop sa media. Total, wa may kahadlokan si Mayor Labella sa City Hall media. Dapig man kini sila kaniya.
Kon akoy PIO, siguruon lang nga di siya masipyat labi na kay uso na karon ang FB Live. Dili na pareho sa ubang panahon nga ang media magtinapulan ug maghulat na lang sa press release.
Usbon ko, mas maayo nga maghimog pamahayag si Mayor Labella. Dayon mapakita siya og pruweba. Labing maayo kon ma-interbyu ang iyang doktor. Kon dili niya madala ang doktor inig press conference, bisan magpakita siya og medical certificate. (@anol_cebu sa Twitter)