SUPERBALITA CEBU

Espinoza: Mao na ni?

Nagpakabana

DUNAY natala nga 97 nga bag-o nga kaso sa Covid-19 niadtong Sabado, Enero 23, matod pa ni Kon. Joel Garganera, ang deputy chief implementer sa Emergency Operations Center (EOC) sa Dakbayan sa Sugbo. Mao na ni ang atong gisulti sa unahan nga mosresulta gyud ang pagtapok-pundok sa mga tawo atol sa pagselebrar sa Pasko, Bag-ong Tuig ug sa Pista Senyor.

Matod pa sa taho sa SunStar Cebu, nag-una ang Dakbayan sa Sugbo sa daghan og kaso sa Covid-19 sa tibuok Central Visayas. Sa total nga 2,531 nga aktibo nga kaso sa Covid-19 sa rehiyon, ang Dakbayan sa Sugbo dunay 903, ang Negros Oriental 722, Probinsya sa Sugbo 536, Dakbayan sa Mandaue 230, Lapu-Lapu city 115, Bohol 22, ug tulo sa Siquijor.

Atong mahinumduman nga ang mga doktor ug nurse sa VSMMC nga nag-party niadtong Pasko sa usa sa mga hotel sa dakbayan sa Sugbo natakboyan og Covid-19 hinungdan sa pagsira sa makadiyot sa emergency room sa hospital. Mga abay mao ni klase sa sakit nga di moila og mga doktor ug nurse. Sa ato pa, angay ta nga magmatngon ug motuman sa mga health protocol.

Maayo na lang gani nga wa gitugtan sa Inter-Agency Task Force (IATF) ang Sinulog showdown. Kay kon nadayon pa ang plano ni Cebu City Mayor Vice Mike Rama sa Sinulog showdown bisan og sa video lang, morag mas modaghan pa ang naigo sa coronavirus. Ang sayaw-Sinulog maoy panapos nga kalihokan sa Pista ni Señor Sto. Niño, nga gipangulohan sa Sinulog Foundation Inc.

Daghan pa gihapon mga tawo nga dili tinuod-buot ang pagtuman sa mga lagda sa health protocol. Motuman ning mga klase sa tawo sa husto nga pagsul-ob sa face shield ug mask igsulod sa mall kay di man pasudlon sa gwardya. Apan og naa na sila sulod sa mall, ang ulo ang gitabonan sa face shield ug ang mask naa ra sa suwang o di ba kutob ra sa baba, wa gilakip ang ilong.

Ang Brgy. Guadalupe, Dakbayan sa Sugbo gi-lockdown tungod sa kadaghan sa kaso sa Covid-19. Dunay 50 ka tawo nga natakboyan sa Covid-19 sa Guadalupe. Matod pa ni Guadalupe Brgy. Capt. Michael Gacasan ang 50 ka kaso nakatag sa 30 ka sitio sa Guadalupe.

Kining bag-o nga pagsaka sa kaso sa Covid-19 dinhi sa Dakbayan sa Sugbo resulta ni sa dakong kumpiyansa sa katawhan dihang gitaho nga mikunhod ang takod sa Covid-19 sa miaging tuig sa wa pa ang Pasko. Bisan pa sa pahimangno sa kadagkoan, labina na sa Department of Health 7, naay mga tawo nga ang gipalabi paglipay-lipay ug pundok atol sa Pasko, Bag-ong Tuig, ug Pista Senyor.

Matod pa sa taho, dunay 11,861 nga kumpirmado nga kaso sa Covid-19 ang Dakbayan sa Sugbo ug 702 na ang namatay. Hinuon, dunay 10,257 ka tawo nga nakalingkawas sa Covid-19. Ang data sa EOC nagpasabot nga ang 55 porsento sa 903 nga aktibo nga kaso sa Covid-19 sa Dakbayan sa Sugbo mga bag-o.

Ang atong nasud dunay 511,679 na nga kaso sa Covid-19 sukad niadtong Enero 23.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!