SUPERBALITA CEBU

Editoryal: Di drama, di ilad

Editorial Cartoon by Ariel Itumay

MIBALIK na sa normal ang dagan sa trapiko. Naghuot na sab og balik ang mga sakyanan human sa pipila ka mga buwan nga quarantine. Kon unsa man kahuot ang karsada, ingon sa mibalik usab ang inadlaw nga gidaghanon sa mga kaso sa coronavirus disease (Covid-19).

Unya dunay mga netizen nga nagtuo nga kini conspiracy, gituyo sa kagamhanan aron makapanguwarta kun makapangurakot.

Pastilan baya ni nga mentalidad kon maoy maghari, way padulngan ang tinguha sa kagamhanan nga recovery, labina sa ekonomiya, kay kining matanga sa hunahuna iya sa mga tawo nga kompyansa kay kuno way Covid, mugna lang sa gobyerno.

Di baya na tinuod kay ang gobyerno mismo nagdugo tungod sa kadako sa iyang gasto sa Covid. Kada test gastuhan, wa pay labot ang suporta sa pagkaon, tambal ug supplement. Di man ang gi-Covid ang naggasto.

Wa mag-drama ang gobyerno sa pagsaka aning mga kaso sa Covid sa Dakbayan sa Sugbo kay nasayod ang administrasyon nga mobalik pagdugo og maayo ang panudlanan. Inay madapat ngadto sa ubang mga proyekto, adto na kini sa Covid mapunta.

Sumala gud, pila ka bilyon ang nakuha sa pahat sa budget sa Cebu City sa miaging tuig? Mibubo og P1 billion ang administrasyon ni Mayor Edgardo Labella aron pagkombate sa sakit bisan kon ang buhis nga income niini alang sa panudlanan nagkagidalay. Kay kon way hapit lihok ang mga negusyo, way hapit mosulod nga buhis sa gobyerno. Ang buhis baya ang kinabuhi sa kagamhanan. Mao ni ang iyang dugo.

Karon nga misaka ang gidaghanon sa mga infection sa Covid, pag-amping intawon. Tumana ang mga health protocol aron di mataptan. Kon giuhaw ka og inom, dimdim sa imong paboritong ilimnon nga mag-inusara sulod sa imong balay. Likayi ang mga tagay kay ang pagsaka sa mga Covid karon di drama, tinud-anay ni.

Wagtanga ang hunahuna nga ang kagamhanan nangilad ning higayuna. Basin inig mata nimo, usa na diay kas natakdan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!