TANAN nakong suki nga kan-anan mitiyabaw karon sa grabe ka mahal nga presyo sa karneng baboy sa merkado.
Suma pa nila nga tungod sa pagsaka sa presyo sa karneng baboy, wala na silay kita. Mao nga kada kaon nako sa ilang kan-anan, magpanglingo intawon sila kay wa nay ginansiya.
Sa among panaghisgut, kung di gyud maalibyohan sa gobyerno ang grabeng pagsaka sa presyo sa mga palaliton, mapugos sila pagsirado sa ilang negusyo.
Kay kung magpadayon sila, mahurot ilang diyutay nga tinigom sa pagtapada sa arkila, suweldo, suga, tubig, ug uban pa.
Tungod kay mitiyabaw na ang mga konsumante, gihangyo karon sa Hog Farmers Association of Davao Inc. (Hogfadi) ang Department of Agriculture (DA) nga sulbaron ang pagsaka sa presyo sa karneng baboy sa merkado.
Misaka ang presyo tungod kay ubos kaayo nga suplay gikan sa mga backyard hog raisers kay naigo ilang mga hayop sa African Swine Fever (ASF) dinhi sa rehiyon.
Giingon ni Hogfadi president Eduardo So sa pakighinabi sa SunStar Davao nga di na mahatag sa mga hog raisers ang gikinahanglan nga suplay sa karne sanglit gipamatay ilang mga binuhing baboy aron di mokuyanap ang kagaw.
Gipasabot niya nga di nila makontrol ang presyo sa merkado sanglit di nila kontrolado ang ASF.
Tungod niini, giingon sa grupo nga mas maayo nga mohimo og alternatibo nga paagi ang DA sama sa pagsusi una sa mga baboy sa di pa pamatyon.
Kadtong negatibo sa ASF nga mga baboy, ibaligya kini sa merkado, samtang ang mga positibo maoy pamatyon sa gobyerno.
Alang nako, maghuna-huna ang gobyerno ug ilang mga eksperto kung unsay mas maayong buhaton aron malikay kita sa ASF. Pipila niini ang di pag-angkat sa produktong baboy gikan sa mga apektadong nasud ug ang pagbaton og bakuna batok ASF.
Kay kung di molihuk ang gobyerno, mga suki ng tigbasa, mag-ilaid sa tumang kalisud ang mga hog raisers, negusyante, ug kitang mga konsumante.
***
Daghang salamat sa pagbasa sa atong mga suki sa Windmills Store sa Gaisano Mall of Davao nga gipangunahan sa ilang cellphone technician Reneboy "Kagawad" Abella Dayte, Rizza Mae Tabanao, ug Lorraine Abello.