MOKABAT na sa 15,470 ka mga indibiduwal ang naaresto subay sa istriktong pagpatuman sa community quarantine guidelines sa Davao City sukad sa bulan sa Mayo 2020.
Kini subay sa datus gikan Davao City Police Office (DCPO) diin hangtud Enero 23, 2021, ang DCPO nakarekord og 3,262 ka malapason sa curfew hours, 555 sa liquor ban, 6,617 sa social distancing ug mass gathering, 2,333 sa wala magsuot og face mask, 2,670 sa wa mag-face shield ug 33 nga mipresenta sa peke/tampered nga RT-PCR results, nga mototal sa 15,470 na ka mga indibiduwal.
"Of the 33 apprehended, 10 cases were already filed before the court," sumala ni Angel Sumagaysay, hepe sa Public Security and Safety Command Center (PSSCC).
Sa maong ihap, anaa sa 3,800 ka kaso ang napasaka kontra malapason, samtang miabot sab sa 2,880 ang nakalapas sa wa pag-angkas og motor nga way barrier, diin 902 ka kaso na ang napasaka.
Tungod niini, nagpahimangno ang DCPO sa publiko nga motuman gayod sa mga health protocols aron malikayan ang local transmission sa virus.
Mas igmat sab karon ang DCPO ug ubang yunit sa awtoridad sa istriktong pagpatuman sa mga health protocols labi pa kay nakasulod na sa Pilipinas ang bag-ong variant sa Covid-19.
Gipahinumdoman ang tanang Dabawenyos nga ang regulasyon sa siyudad ug mga lakang kontra Covid-19 magpabilin samtang anaa ubos ang nasud sa state of public emergency. (Uban sa taho sa CIO)