NUNOT niining nasinating kalisod sa pandemya diin daghan ang nawad-an ug naapektohan ang panginabuhian, si Kongresista Paz Radaza mihatag og hinabang sa mga naglisod pinaagi sa pagtunol og P100,000 isip puhunan ngadto sa mga mamuhatay og trapo sa Sitio Kulo ug Sitio Tangke, Barangay Basak, Dakbayan sa Lapu-Lapu.
Gipahibawo ni Radaza atol sa gipahigayong seminar/orientation sa kababayen-an sa duha ka mga sitio niadtong Enero 23, 2021.
“Sayod man kita nga dako gyud og damage ang pandemic labi na sa ordinary laborers, mostly ani nila ilang mga bana way trabaho kay naundang. Mao nga kita sa atong opisina mohatag ko og personal nako nga tabang para sa ilang puhunan”, pulong ni Radaza.
Si Radaza naila nga founder sa Kababayen-an sa Opon nga Nagkahiusa alang sa Kalamboan (Konka), organisasyon sa kababayen-an sa dakbayan.
Gitukod kini niadtong 2010 sa dihang siya pa ang mayor sa dakbayan aron paghatag og panginabuhian sa kababayen-an aron makaabag sa ilang mga bana sa gasto sa balay.
Oktubre 2020 tuig gilusad ang usa ka event sa grupo sa kababayen-an isip pag promote sa ilang nagkalain-laing mga produktong lokal matag barangay aron matabangan nga makabangon niining panahon sa pandemya. (GCM)