MAKABATON og pito ka dagkong proyekto balor of P500 milyones ang Dakbayan sa Sugbo ubos sa flood control poject sa Department of Public Works and Highways (DPWH) 7.
Si Konsehal Jerry Guardo, chairman sa committee on infrastracture sa City Council, nagkanayon nga ang pundong gamiton gikan sa DPWH Cebu City District Engineering Office nga gipangulohan ni Flordeliz Nuñez.
Ang mga proyekto langkuban sa P50 milyones nga pagpalapad ug pagpalawom sa sapa nga sa utlanan sa T. Padilla ug Tinago;
P50 milyones sa utlanan sa Day-as ug T. Padilla; P50 milyones sa boundary sa Lorega San Miguel ug Zapatera nga duol sa DepEd Cebu City ug laing P50 milyones para sa sapa nga nahimutang sa Gen. Maxilom Avenue diin naanod ang 16 anyos nga bayongbayong niadtong Oktubre 2020.
Samtang tag P100 milyones ang sapa nga nilagbas sa dalan Tagunol sa Pardo area; P100 milyones sa Bulacao ug laing P100 milyones para sa Butuanon habig sa Barangay Talamban.
Si Guardo nagkanayon nga nagpahigayon og inspection ang engineering district office para sa ipahigayon nga proyekto.
Daghang mga balay ang gipangtukod daplin sa kasapaan sa informal settlers.
Naglisod ang kagamhanan sa pagpapahawa kanila bisan nakalapas ang mga tag-iya sa three-meter easement nga gimbut-an sa balaud. Sa imbentaryo sa Siyudad sa mga estruktura, kapin sa 1,000 ang nakababag sa sa kasapaan.
AYUDA
Matod ni Guardo nga lakip sa tan-awon mao ang mga estruktura nga maapektohan sa proyekto ug ang ilang mga ngalan iduso ngadto sa Division for the Welfare of thr Urban Poor (DWUP).
Ang DPWH adunay P140 milyones nga gi-download ngadto sa City Hall para ayuda sa mga maapektohan sa implementasyon sa proyekto.
Ang City Council maoy mopalabang og resolution sa Konseho pinaagi sa committee on housing ni majority floor leader Raymond Garcia aron paghatag og financial assistance sa maapektuhang mga pamilya.
Ang DWUP nga gipangulohan ni Simeon Romarate moapud-apod sa ayuda ngadto sa mga tagbalay sama sa ilang gibuhat sa Tinago-Tejero nga implementasyon sa flood control project diin matag pamilya nakadawat og tag P35,000.
Matod ni Guardo nga sa di pa mahuman ang unang tulo ka tuig ni Mayor Edgardo Labella, maminosan na ang epekto sa baha gumikan sa maong mga proyekto.