LOLA naputos sa mga samad dinunggaban dihang napalgang patay sulod sa iyang balay sa Lunes sa alas 6:30 sa gabii sa Brgy. Unidos, lungsod sa San Francisco, Isla sa Camotes.
Si Elsa Limosnero Pleños, 69, biyuda, nakaangkon og mga samad dinunggaban sa dughan ug duha sa buko-buko.
Si Police Master Sgt. Jose Florentino sa San Francisco Police Station nga nahinabi sa Superbalita Cebu nagkanayon nga si Pleños nakainom sa wa pa makit-ing patay.
Matod niya nga nag-inusara na lang si Pleños sa iyang balay kay ang iyang mga anak toa sa Mindanao.
Mga paryente niya mao na lay silingan nga nakurat dihang napalgan si Pleños nga nagkadugo. Gisubay pa nila karon ang impormasyon nga si Pleños testigos sa kaso sa yuta sa ilang lugar.
Samtang sutaon sab nila kon wa ba kiniy gikaaway atol pag-inom. Wala pa nila maestablisar kon tulis ba ang motibo sa krimen.
Wa magkatag ang mga butang dihang gi-inspek sa kapulisan.
Dunay kwarta si Pleños kay bag-o lang kini nga nakadawat sa ayuda nga Special Amelioration Program (SAP) sa gobiyerno. (GPL)