ARON mapanalipdan ang P11 bilyones nga hog industry sa Lalawigan sa Sugbo batok sa African Swine Fever (ASF), gidid-an na ang pag transport og baboy sa Sugbo ang mga truck gikan sa Mindanao, Luzon ug Leyte-Samar.
Kini maoy gipahibaw sa Kapitolyo nga nauyonan sa tigum ni Cebu Governor Gwendolyn Garcia kauban ang truckers, hog raisers, provincial veterinarian ug uban pa.
Subay niini, ang accredited truckers lang gikan sa Sugbo ang mahimong mo-deliver og baboy sa ubang probinsya pinaagi sa dropoff point.
Ang accredited truckers na maoy mohatod sa mga baboy ug sugaton sa trucks sa mga pantalan kutob sa Matnog Port sa Probinsya sa Sorsogon.
Gipasabot ni Garcia nga ang pagpatuman niini subay sa paspas nga pagtakod sa ASF kay mahimong paagi sa foamites nga taptan sa mga virus sama sa sinina, sapatos ug mga sakyanan.
“Kay atong presumption ani ron kana tanan nga tuas gawas sa Cebu dunay possible nga dunay foamites nga magdala og ASF nato. So, we are protecting the island,” pagpasabot ni Garcia pinaagi sa news portal sa Kapitolyo.
Sa pagbalik na sa mga accredited trucks sa Sugbo, kinahanglan nga sundon sa mga trucker ang mosunod:
Una mao ang mandatory disinfection sa trucks, livestock transport carrier ug mga reefer vans.
Ikaduha, kinahanglan usab nga mosumiter og disinfection clearance gikan sa veterinary quarantine gikan sa port of origin.
Ikatulo, kinahanglan nga mohatag og downtime period sulod sa pito ka adlaw aron maka-disinfect sa mga gigamit nga trucks. Human niini hatagan na sila og clearance sa Kapitolyo pagpamatuod nga nipaubos na sila sa saktong proseso sa paghinlo.
Ikaupat, kinahanglan nga mosumiter sa ilang rota sa border sa di pa ang shipment. Lakip na niini ang mga regulatory documents sama sa veterinary health certificate ug shipping permit. (ANV)