SUPERBALITA CEBU

CCPO: Ex-pulis nga gipatay ‘durugista’

GISUSI: Mga personnel sa Scene of the Crime Operation misusi sa dapit nga natumbahan ni kanhi police patrolman Rodel Demaangay kinsa gipusil patay sa riding in tandem Enero 25, 2021 sa Bliss, Barangay Labangon, Dakbayan sa Sugbo. / BENJIE B. TALISIC

DRUGAS ang usa sa gitan-aw nga motibo sa pagbanhig patay kang kanhi patrolman Rodel Mendez Demaangay human giingong nalambigit sa illegal nga kalihukan sa A. Lopez, Barangay Labangon, Dakbayan sa Sugbo.

Matod ni Police Lieutenant Colonel Wilbert Parilla, deputy city director for operations sa Cebu City Police Office, nga sa wa pa gilabay sa Bangsamoro Autonomous Region in Muslim Mindanao mogawas ang ngalan sa kanhi pulis sa mga madakpan nga nalambigit sa illegal nga drugas.

Giingong gikan niya ang supply sa illegal nga drugas sa matag madakpan sa Labangon Police Station hinungdan nga gilabay siya sa Negros Oriental Provincial Police Office (Noppo) sa sayong bahin sa 2018.

Sa 2018, nalambigit na usab siya og kontrobersiya sa maong probinsya hinungdan nga ang hepe kaniadto sa Police Regional Office 7 nga karon PNP Chief Police General Debold Sinas, nipalabay kaniya sa Mindanao.

“With regards sa iyang record everytime nga naay mga dakop, iyang pangalan maoy mogawas. So, mao nang gi-check, it was found out nga duna gyud siyay involvement,” matod ni Parilla.

Apan dugang ni Parilla nga wala usab nila wad-a ang ubang anggulo sa krimen ilabi na nga nadestino kini kaniadto sa mga police station sa Dakbayan sa Sugbo isip operatiba.

GI-BUY-BUST

Usa sa mga kasaligang tinubdan gikan sa Police Regional Office 7, nitug-an sa Superbalita Cebu nga sa dihang nadestino sa Mindanao si Demaangay, hapit kini madakpan atol sa entrapment operation sa mga sakop sa Counter-Intelligence Task Force (CITF) nga mao na karon ang Integrity Monitoring and Enforcement Group-IMEG apan naka bantay nga pulis ang iyang gikasabot.

Gipasakaan siya og three counts of grave misconduct sa Regional Internal Affairs Service sa Police Regional Office Bangsamoro Autonomous Region. Hunyo 25, 2020 migawas ang iyang dismissal order.

Septiyembre 2020 miuli siya dinhi sa Siyudad sa Sugbo ug wa nagpahibawo nga natangtang na siya sa serbisyo.

Gani, ang iyang mga kaubang pulis gitug-anan sa biktima nga aktibo pa siya nga sakop sa Philippine National Police (PNP).

Giingong siya nagpadayon sa iyang illegal nga kalihukan.

Gani, adunay mireklamo nga nanakop siya og drug personality sa Labangon apan gibuhian ra usab human nakapangayog dakong kantidad.

Nasulod sa serbisyo si Demaangay niadtong 2007 ug nadestino siya sa mga police station sa siyudad lakip na sa mga special unit sa CCPO.

Adunay nakuha nga 9mm Glock pistol ang Labangon police station. / AYB, BBT

Nasuta nga iya kining isyu gikan sa Mindanao nga gitakdang i-turnover sa mosunod nga mga adlaw.

WA KINAHANGLANA

Special Investigation Task Group (SITG) alang kang Demaangay wa kinahanglana kay di siya kwalipikado.

Gipasabot ni Police Captain Jonathan Dela Cerna, hepe sa Labangon Police Station, nga kon wa na sa serbisyo si Demaangay, di na kinahanglan ang pag-umol og SITG.

Dugang ni Dela Cerna nga unta di mamahimong dautan ang pagsabot sa pamilya ni Demaangay.

“No need na. Dili na masulod sa parameter kay dili naman siya pulis. Masulod siya kon active pa siya sa duty,” pasabot ni Dela Cerna.

Apan gipahibawo usab ni Dela Cerna nga bisan kon way SITG, magpadayon gihapon ang ilang imbestigasyon.

“Actually duna tay mga witnesses sa hitabo. Apan ang usa sa atong problema gyud karon nga nitumaw, ang atong mga witness dili gyud maka identiify sa mga suspek kay pulos man gud tabon ang ilang mga nawong, dili sila maka determine,” dugang ni Dela Cerna. (AYB, BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph