ADUNAY pito ka mga nagpositibo sa coronavirus disease (Covid-19) ang nadangat sa Cebu City Quarantine Center (CCQC) human sa pipila ka adlaw nga kini subling gibuksan.
Si Yvonne Cania, hospital administrator sa Cebu City Medical Center ug nagdumala sa CCQC, nagkanayon nga gi-admit ang maong mga tawo Enero 25.
Matod ni Cania, nangandam silang daan kon ugaling mosaka pa ang gidaghanon nga malandig sa CCQC nga adunay 160 ka tawo ang kapasidad.
Ang Cebu City adunay 955 ka aktibong kaso sa Covid nga niabot og 70 ka individual ang nataptan sa Covid base sa resulta nga gipagawas niadtong Enero 25.
Si Mayor Edgardo Labella, nimando sa pag-activate sa CCQC kay puno na ang Noah complex didto sa South Road Properties nga adunay 300 ka tawo ang kapasidad.
Ang Bayanihan Cebu IEC Field Center nga adunay 130 bed capacity moabot sa 77 ang na-admit human nataptan sa Covid-19, base sa labing uwahing ihap niadtong Enero 26.
Ang Bayanihan Cebu Sacred Heart Field Center adunay 50 bed capacity nga na-istambay na usab.
Gawas sa mga nahisgutang mga quarantine facility nga pulos air-conditioned gawas lang sa Noah complex, ang Cebu City adunay mga barangay isolation centers nga nahimutang sa eskwelahan sa Barangay Mambaling sa south district ug Zapatera sa north district para adto ibutang ang mga asymptomatic Covid-19 positive. (PAC)