HUMAN sa tulo ka adlaw nga gi-anunsiyo sa Malacañang nga nagtugot sa 10 anyos ngadto na sa 65 anyos ang makagawas-gawas ilabi na niadtong dapit nga gipaubos sa modified general community quarantine (MGCQ).
Apan gibakwi ni Presidente Rodrigo Duterte ang maong kamanduan niadtong Lunes, Enero 25.
Nipasabot si Durterte nga nanagana lang siya ug aron sab mapanalipdan ang mga menor de edad ilabi na niining laing sitwasyon sa Covid-19.
Ang Inter-Agency Task Force (IATF) niluwat og resolution niadtong Enero 21 nga nagtugot na sa mga bata nga nag-edad og 10 ngadto na sa 65 anyos nga makagawas sa ilang mga balay ngadto lang sa mga areas nga gideklarar nga MGCQ nga sugdan sa pagpatuman sa unang adlaw sa Pebrero
Sa kasamtangan ang gitugotan pa lang mao kadtong nag-edad og 15 ngadto na sa 65 anyos, apan kadtong masakiton lakip na ang mga mabdos ang gidid-an nga mogawas.
SUD BALIK
“So balik ho kayo sa bahay muna and besides ‘yung 10 years old to 14... Itong medyo matanda na mahirap itong i-manage but itong 10, 11, 12 puwede na ‘yan sila sa TV. They can glue their attention sa TV the whole day.
“Pasensiya na po kayo. Mine is just a precaution. Wala itong bisa... Takot lang ako kasi itong bagong strain strikes the young children,” pamahayag sa presidente atol sa iyang senimana nga public address niadtong Enero 25.
Gipasabot ni Duterte ang bag-ong Sars-CoV-2 variant diin dali nga mataptan ang mga menor de edad.
PAHINUMDUM
Sugbli nga nanawagan ang presidente sa publiko nga padayon nga magtamod sa health protocol. “For the sake of humanity, ‘yung kapwa mo tao, bayan mo, kindly obey the protocols: washing of the hands — sana susundin ninyo ito,” pahinumdum ni Duterte.
Nunot sa nasinating pagsaka usab sa kaso coronavirus disease (Covid-19) sa Dakbayan sa Lapu-Lapu nahukman sa kagamhanan ang pagpatuman pagbalik sa number coding sa mga sakyanan ug sa quarantine pass niadtong mogawas sa ilang tagsa-tagsa ka mga panimalay.
LAPU-LAPU
Samtang number coding sa mga sakyanan ug pagdala-dala sa quarantine pass ang ipatuman og balik sa Lapu-Lapu City.
Kini ang gipahibawo ni Lapu-Lapu City Mayor Junard Chan sa katuyoan nga ma-regulate ang mogawas sa ilang mga panimalay.
Dili buot ang mayor nga mosangpot pa nga mabalik pagpaubos sa estriktong quarantine status ang dakbayan gumikan sa pagsaka sa mga kaso sa Covid sanglit nasayod siya nga tanan ang maapektahan gayud niini.
Gimandoan na usab ni Chan ang mga sakop sa Lapu-Lapu City Police Office LCPO sa pagbalik ug roving sa mga publikong mga dapit aron sikopon ang mga wala magsul-ob og mask ug face shield ug ingon man ang wala mag-obserbar sa physical ug social distancing.
Apil na unya niini ang imnanan nga gitugotang maka-operate sa kondisyon nga duha lang ka botelya ang i-serve sa matag kustomer.
Multa o pag-estar ug usa ka gabii sa City Auditorium mao unyay silot sa mga madakpan nga nakalapas quarantine ug health protocol.
IPAHUNONG
Lakip sa gipahimangno-an sa mayor ang mga subdibivision ug kabarangayan nga ipahunong ang pagduwa ug volleyball ug basketball sanglit gidili gihapon kini ubos sa modified general community quarantine (MGCQ).
Si Chan nitug-an nga daghan siyang nadawat nga mga taho kalabot niini busa iya na kining ipasusi usab sa kapulisan ug mga opisyales sa barangay aron ipahunong.
Pabilin gihapon makaligo sa kadagatan sa dakbayan apan kinahanglan nga sundon ang 50 percent capacity aron kalikayan ang pagdugok sa mga tawo.
“Usbon ko: Ang Covid anaa pa wala pa nabalik sa normal,” matod ni Chan. (SunStar Philippines, GCM)