SUPERBALITA CEBU

Balay-Balay, Tubig-Tubig: Ig-agaw nanghikap

Dear Atty. Joan,

Ako si Linda, inahan sa duha ka batang babaye nga nagpangedaron og 15 ug 17 anyos.

Nakugang ko sa akong nasaksihan samtang natulog akong mga bata. Duna man gud koy pag-umangkon nga lalaki, anak sa igsuon sa akong bana, nga nagpuyo sa amoa human wa pa kini makauli sa ilang probinsya. Natanggong siya tungod sa pandemiya.

Sa dihang natulog akong duha ka dalaga, nasaksihan sa duha nako ka mga mata ang law-ay nga hitabo.

Tungod kay abli ang pultahan sa ilang kwarto pagkakadlawon, ako untang sirad-an ang kwarto. Nahugno akong kalibutan human nakit-an nako nga gihikap sa akong pag-umangkon nga lalaki ang dughan sa akong kinamanghurang anak samtang nagduwa sa iyang kinatawo ang maong lalaki.

Misyagit ako sa kakurat. Nakamata ang mga tao sa panimalay. Wala man akong bana niadtong panahona tungod kay aduna siyay business trip. Gipalayas dayon nako ang ilang ig-agaw. Wa namiy balita sa maong lalaki.

Gusto unta sa akong bana nga kalimtan na lang ang maong hitabo kay matod pa 18 anyos lang ang maong lalaki ug angay pasayluon kay maguba unya ang kaugmaon ini kon mabalhog. Nangayo sab og pasaylo ang mga ginikanan sa mga bata.

Apan dili ko kumbinsido nga angay lang kalimtan ang hitabo. Na-trauma ang akong mga dalaga. Gani, duna silay regular session sa usa ka psychologist human sa hitabo. Ganahan sab ang akong mga bata nga mapanubag ang ilang ig-agaw.

Mahimo ba nga pasakahan og kaso ang ilang ig-agaw bisan pa man nga kadugo kini sa mga gibiktima? Unsa may angay namong buhaton, Atty. Joan?

Daghang salamat!


Imong magtatampo,

Josefa

Dear Josefa,

Una sa tanan maayong adlaw usab kanimo diha Josefa ug salamat sa imong pagsunod niining lindog.

Subay sa imong sulat, dunay nahimong kalapasan sa balaod ang ig-agaw sa imong mga bata. Bisan pa man nga kadugo nila ang sad-an, mahimo nga pasakahan og kaso ang lalaki.

Usa ka kalapasan sa Anti-Child Abuse Law ang nahitabong pagpanamastamas sa imong mga dalagang anak. Matawag nga “acts of lasciviousness” ang pagpanghilabot niya sa imong bata ug mahimo nga mapriso ang maong lalaki bisan pa man nga walay nahitabong pakighilawas.

Tungod kay wala pa ninyo nasumbong ang hitabo sa otoridad, ipa-blotter usa ang hitabo didto sa barangay o sa kapolisan. Mas maayo nga duna kamoy record sa insidente aron magamit nga ebidensya kon magkinihaay na.

Mahimo sab kamo nga mudangop nadto sa Women and Children’s Protection Desk (WCPD) sa inyong kapolisan nga maoy muandam sa pormal nga reklamo didto sa piskaliya. Kon hingpit na nga maduso ang reklamo sa piskaliya, paabuton ninyo ang resolusyon sa maong sumbong.

Kon makita sa piskaliya nga dunay igong ebidensya nga mupamatuod sa reklamo, murekomendar kini sa pagsang-at og kaso atubangan sa husgado. Mahimo dayon nga mupakanaog og arrest warrant ang korte aron dakpon ang sad-an.

Daghang salamat, Josefa, sa imong sulat tampo ug hinaot nakahupay ang maong tambag sa naghuot mo karon nga galamhan.

Imong alagad,

Atty. Joan


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph