SUPERBALITA CEBU

Diputado: Unsay rason sa gobernador?

Cuentas Claras

DAGHAN ang natingala sa gihimo ni Governor Art Yap nga, matod pa, paglisodlisod niini sa mga empleyado sa Kapitolyo sa pag-atender sa imbitasyon sa usa ka sakop sa Sangguniang Panlalawigan (SP) kalabot sa usa ka imbestigasyon nga pagahimoon niini.

Matod pa, giimbitar ni Board Member Dionisio Victor Balite ang usa ka empleyado sa Provincial Treasurer’s Office aron mosulti kini sa iyang nahibaw-an bahin sa balita nga siya kuno ang mihatag sa numero ni “Ivan” aron makontak siya sa mga quarry permitees alang sa ilang delivery receipt.

Apan mipagawas og kasugoan si Yap, pirmado sa Provincial Administrator, nga kinahanglan nga mananghid usa ang maong empleyado sa iyang immediate superior, unya ang superior mananghid na sab sa iyang immediate superior hangtod moabot sa lamesa sa governor.

Maabtan na lang og siyam-siyam usa pa matuki ang maong ïmbitasyon sa Board Member unya wa pa pod seguro og mosugot ba si Yap.

Unsa may buot ipasabot niini?

* * *

Kon gusto sa usa ka tawo mahibaw-an sa katawhan ang tinuod nga panghitabo, ang iyang buhaton mangita siya og paagi nga makasulti o makaesplikar sa iyang nahibaw-an.

Ingon ani lamang nga paagi nga masabtan sa katawhan ang kamatuoran.

Apan kon duna siyay gitagoan o di siya gusto mahibalo ang katawhan, sayon ra pod ang pagpangita og paagi nga malikayan kini.

* * *

Dili pa lang dugay, mipahayag si Yap nga walay Ivan sa kapitolyo, walay corruption sa Kapitolyo ug gani, misaka man ang income sa Probinsiya sa buhis gikan sa quarry operations.

Kay mao man kaha kini, daghan ang natingala ngano nga pugngan o lisod-lisoron man sa gobernador ang pagpakisayod sa board member sa nahibaw-an sa maong empleyado sa Kapitolyo.

Nagtuo ang kadaghanan nga mas malipay pa unta gani ang gobernador nga malimpiyo ang dungog sa Kapitolyo sa maong eskandalo ug maklaro gyod nga walay gibasehan ang pasangil nga dunay panapi ang gitawag og Ivan sa quarry operations sa probinsiya.

* * *

Ang sangguniang panlalawigan dunay gitawag og oversight function ug tungod niini, mahimo nga mopatawag ang sanggunian ni bisan kinsa ‘in aid of legislation.’

Apan kon dunay order susama sa gihimo ni Governor Art Yap, walay mahimo ang sanggunian kon dili mosugot ang gobernador.

Husto ba kini?

* * *

Unsa kahay buhaton ni Vice Governor Rene Relampagos niini? Moreklamo ba siya sa gihimo ni Yap o magpakahilom lang?

Kining gihimo ni Governor Yap, mao na ba kini ang mahitabo kanunay kon dunay imbestigasyon nga pagahimoon sa sanggunian, bisan og dili mahitungod kang Ivan?

Labaw sa tanan, sa gihimo ni Yap, motuo kaha ang mga Bol-anon nga walay corruption sa Kapitolyo?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph