GISUBAY karon sa kapulisan, inabagan sa militar, ang nahitabong pagpamomba didto sa Barangay Sibsib, Tulunan, North Cotabato, kagahapon, Miyerkules, Enero 27, 2021.
Ang pagpamomba mikalas og duha ka kinabuhi nga si Gina Paunon, 53, minyo ug nagpuyo sa maong barangay samtang ang usa mao si Eduard Odango, 54, kinsa giingong giatake sa high blood nga duol lang sa yunit sa Yellow Bus Line, Inc. nga nadamay sa hitabo nga dunay body number nga 2988 kon diin niadtong higayona nihunong sa atubangan sa ticket booth kay dunay ninaug nga pasahero.
Sumala kang Cotabato Police Provincial Office Director Colonel Henry Villar nga mibusikad ang dili pa matino nga klase sa improvised explosive device sa giabandona nga ticket booth sa Barangay Sibsib sa maong lungsod.
Naigo sa mga mituasik nga tipaka sa bomba si Paunon samtang mga samaron gihatud ngadto sa SMMC Hospital. (Edgar E. Fuerzas)