Daghan ang gisayangan niining kalit nga pagkanselar sa pag-host unta sa Pilipinas sa third window sa FIBA Asia Cup 2021 qualifiers nga gikatakda unta sunod buwan.
Ang Samahang Basketball ng Pilipinas (SBP) mipahibawo nga dili na makapahigayon ang Pilipinas sa maong qualifiers nga adto unta sa Clark, Pampanga nga ipaubos sa bubble tungod sa travel restriction nga gipasuod karon og balik sa nasod tungod ning pagsaka og balik sa mga infections sa Covid-19 coronavirus.
Ang Pilipinas mao man gyud unta ang mo host sa Group A ug Group C alang sa final windown sa qualifiers sa regional or continental tournament.
Tungod niini, ang FIBA nangita na karon og motubos o maoy mohulip sa Pilipinas nga maoy maka host sa third window.
Buot ipasabot, nawad-an sa homecourt advantage ang Gilas Pilipinas nga mao unta ang maghatag og pabor kanila.
Sa ato pa, kita na ang manulong. Pero way paglubad ang hugot nga pag-ensayo sa kinatibuk-ang puwersa sa Gilas diha sa ilang kaugalingong bubble sa Calamba, Laguna. Wa silay kompiyansa kay basin og mahinayon ang third window sa sunod buwan sa nasod nga wa pa nato masayri.
Bugtong ang higanting si Kai Sotto, 7-2, na lang ang gipaabot nga makasalmot sa ilang ensayo.
Sa kasamtangan, si Sotto atoa pa sa Estados Unidos ubos sa Ignite squad, ang iyang mother team sa G-League, nga nagpreparar usab alang sa ilang bubble tournament nga ipahigayon sunod buwan.
Dunay conflict sa schedule ni Sotto, apan mas gipalabi pa niini ang iyang committment sa Gilas Pilipinas aron makatabang sa nasod. Dili gyud unta uyon ang ilang coach nga si Brian Shaw niini apan hugot gyud nga gibarugan ni Sotto ang iyang desisyon bisan pa man og kini makaapekto sa iyang tinguha nga makaduwa sa NBA.
Sa G-League man gud, atoa didto ang saktong exposure kay didto man maniid ug mag-scout ang mga NBA teams kon kinsay ilang hulboton panahon na unya sa drafting. Apan naobserbahan nga ubos sa ilang training, daw og nasentro man ngadto nila ni Jalen Green ug Jonathan Kuminga ang ilang opensa.
Bisan tuod og starting center si Sotto sa ilang team apan kuli kaayo kini nga makahikap sa bola.
Posibling mao ni rason nganong ubos kaayo sa ranking si Sotto sa mock drafts sa mga media entities ug wa gani malakip sa mga potential pick sa 2021 NBA draft.
Gituohan nga kini si Green ug Kuminga masulod gyud sa Top 5 atol unya sa drafting.
So posibling ang desisyon ni Sotto nga moduwa sa Gilas tungod sa pagtuo nga mahatagan siya og importansiya sa opensa ug dinhi mabaid siya og maayo.
Sa Fiba qualifiers, aduna usay mga tag-as nga ikaparang si Sotto apan daghan ang nagtuo nga makapakita gyud si Sotto og impresibong performance batok kanila.
Pero ang pangutana, makapadugang ba kini sa iyang chance sa NBA draft? Posibli. Sigon sa obserbasyon, gawas sa gitas-on, si Sotto adunay itsa sa gawas, makamaong mo-assist, abtik ug taas usab og IQ. Apan ubos sa G-League di kini niya magamit kay di lagi siya maoy priority sa opensa. Giingon nga ang G-League maoy duwa sa mga guards - pakusganay. Butang nga dili haom alang ni Sotto. Wala kahay plano ang team ni Sotto nga usbon ang ilang rota aron makaabot sila sa NBA?jun.migallen22@gmail.com