FRED NUNEZ CANETE
Alegria, Cordova, Cebu
Ang unos sa kalawran
Namukaw sa mga balod
Nga malinawong nangatulog
Sa sabakan sa dagat.
Sa kahipugwat,
Mitimbakuwas ang mga balod
Namangon nga masuk-anon.
Unya daw mga dagkong kabayo
Nanaglumba pagpanagan
Paingon sa halayong unahan
Gilutos ang unos nga mitugaw
Sa ilang kahinanok.
Apan alaot ang mga gapnod
Nga gipanglabyan sa lawod.
Giguyod sila sa mga balod
Gisakwat ug gipangbusdak
Sa tiilan sa lapyahan.
Ug ang baybayon nga
Wa manghilabot napagan
Sa ilang kapungot!