FELIXBERTO A. ESCLAMADO, JR.
Saac II, Mactan, Lapu-Lapu City, Cebu
Niadtong unang panahon may usa ka gingharian diin nagpuyo si Hari Agaton ug si Rayna Umilang. Ang maanindot nilang palasyo diha mahimutang sa usa ka mahabog nga bungtod nga nag-atubang sa kasadpan. Sa ubos sa bungtod may halapad nga dagat. Dinhi nila gipatukod ang ilang palasyo aron makalikay sa mahait nga mga pulong ni Hari Dakoykoy sa kasikbit nga gingharian. May tulo sila ka anak nga pulos babaye.
Gipanghimaraot ni Hari Dakoykoy sila si Hari Agaton ug Rayna Umilang. Gipakatap niya nga si Rayna Umilang may sakit nga mananakod. Apan ang tanan walay kamatuoran. Tinumotumo lang ang mga pasangil ni Hari Dakoykoy tungod kay nasina siya sa kaadunahan nilang Hari Agaton ug Rayna Umilang. Nagtuo siya nga nangilad sila si Hari Agaton sa mga tawo nga magbisitahan sa palasyo. Gibandilyo niya sa ubang gingharian ang manankod nga sakit ni Rayna Umilang uban ang mangil-ad nga mga pulong aron dili na mangadto sa palasyo ang mga tawo.
Nabaniog sa ubang gingharian ang mga maayong hiyas sa pagka tawo nilang Hari Agaton ug Rayna Umilang. Matinabangon sila sa mga tawo nga nagkinahanglan sa ilang panabang. Labaw sa tanan, mananambal si Rayna Umilang nga dili mangayog bayad. Kabos man o adunahan nga dunay sakit nga wala nay alibyo anha modangop kang Rayna Umilang. Gikahibulong gani sa mga lumolupyo nga ang usa ka Rayna nagbaton og kaalam sa usa ka batid nga mananambal.
MIDAGSANG pag-ayo ang mga tawo nga nagpatambal kang Rayna Umilang. Misamot ang kasina ug kaligutgot ni Hari Dakoykoy, mao nga nagsugo siya og tawo aron patyon ang Rayna. Si Tisoy nga usa ka karaang bugoy sa baryo Hagunoy nga nahimo niyang sinaligan maoy iyang gitahasan sa pagbuno sa Rayna. Gihatagan niyag dakong kantidad sa salapi si Tisoy.
Nahiabot si Tisoy sa palasyo ni Hari Agaton Nagpaka-aron-ingnon siya nga usa ka masakiton. Giatol niya nga namauli na ang mga tawo nga nagpatambal sa Rayna. Ug way daghang kuti-kuti giluba niya sa dala niyang balaraw ang dughan sa Rayna dayong sibat.
Sa misunod nga mga adlaw nabaniog dayon sa gingharian ni Hari Agaton ang kamatayon ni Rayna Umilang. Ang balita mikatap dayon sa gingharian mismo ni Hari Dakoykoy kinsa nalipay kaayo pagkasayod niini.
Wala damha nasakit ang anak nga prinsesa ni Hari Dakoykoy, si Prinsesa Ludima. Daghang batid nga mga doktor ang nanganha sa palasyo ni Hari Dakoykoy aron pagtambal
sa prinsesa, apan wala gayud maayo ang balatian niini. Misurender pod ang mga meriko ug mga tambalan sa pagtambal sa pins esa.
Unya dihay tawo nga gikan sa gingharian ni Hari Agaton nga misulti kang Hari Dakoykoy nga sa pagkamatay ni Rayna Umilang gikuha ang kasingkasing niini ug gilain paglubong. Kini sumala sa tugon sa Rayna kang Hari Agaton. Nahibulong kaayo ang mga tawo kay sa dapit diin ilubong ang kasingkasing ni Rayna Umilang may kahoy nga miturok ug mitubo ug namungag tam-is nga mga bunga. Ang bunga pormag kasingkasing sa tawo. Bisag kinsang tawo nga masakiton mamaayo kon makakaon sa bunga.
Miadto si Hari Dakoykoy ug si Prinsesa Ludima sa dapit diin mitubo ang kahoy sa pamasin nga mamaayo sa sakit ang prinsesa. Gipupo sa hari ang usa ka bunga ug gihatag sa prinsesa nga mikaon dayon niini. Unya kalit nga mibarog si Prinsesa Ludima gikan sa ‘wheelchair’ nga gilingkuran ug nakalukso sa kalipay sa dali niyang kaayuhan. Sa iyang bahin, mihilak si Hari Dakoykoy sa naghingapin nga pagbasol sa nabuhat niya kang Rayna Umilang. Mihukom siya nga moadto sa palasyo ni Hari Agaton aron mangayog pasaylo.
(KATAPUSAN)