SUPERBALITA CEBU

Nalzaro: Andam ba ang mga LGUs?

Saksi

NAGKARA-KARA karon ang mga local government units (LGUs) nga mopalit og bakuna alang sa ilang mga konstituwente bisan kon ang nasudnong kagamhanan maoy direktang moangkat sa mga langyaw nga manufacturer. Mosingit gyud sila. Gani gusto sa uban nga derekta silang mopalit sa mga manufacturer. Apan dili man puwede kay moagi man gyud sila sa national government. Wala ko moakusar ha nga nag-apas sila sa komisyon.

Apan samtang nagkara-kara sila sa pagpalit og mga bakuna, kon moabot na kini sa ilang mga hurisdiksiyon, andam na ba ang mga LGU sa ilang vaccine program? Duna na ba silay giandam nga storage para niini, labi pa kadtong mga bakuna nga nagkinahanglan og specialized temperature? Aduna na ba silay plano kon pila ug kinsa ang mga tawo nga mopahigayon sa pagpamakuna? Mga tawo nga anaa sa medical profession ang qualified nga motusok sa mga pasyente.

Sa iyang libro nga nag-ulohan, “Unprepared”, ang anthropologist nga si Andrew Lakoff misuwat nga “adunay mga hulga nga lisod ang pagpangamdam sama sa hulga sa pandemya.” Apan mahimo kitang makapangandam aron sa pagminus sa dautang epekto ning maong matang sa katalagman. Ug sa paghimo niini, atong ilhon ang atong vulnerabilities o atong kahuyangan ug kakuwangan ug dayon atong mahatagan og pagsalig ang atong kaugalingon nga mabuntog nato ang problema.

Taliwala ning maong hanig, atong tutukan ang pagka-andam sa atong mga LGU ning higanting gimbuhaton sa pagpamakuna sa katawhan batok sa Covid 19. Ug sumala sa atong nabati nga balita, aduna gyuy mga LGU nga nag-una sa ilang mga pagpangandam sa vaccination program. Samtang adunay say wala maghikutar kay nagtuo siguro sila nga dali ug sayon lamang kining himuon. Mga LGU nga wala na magpaabot nga han-an ug hulgaon sa taga Department of the Interior and Local Government (DILG) nga sila silutan kon dili mangandam ug molihok.

Ambot sab ni si DILG Sec. Eduardo Ano, wala may laing mahimo gawas sa pagpanghulga sa mga local official, inay motabang paghuna-huna unsaon pagsulbad ang problema. Silutan ang dili makapangandam. Nalimot tingali sila nga kining pagpangandam motrabaho lamang hangtod sa kinutuban sa imahinasyon.

Ug sa bahin sa pagpangandam sa pagpamakuna batok sa Covid 19 ug sa ubang aspeto sa pagsulbad sa problema, imposible ang pag kab-ot og 100 percent nga pagpangandam. (bobbygnalzaro@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph