Di kuli ang posibilidad nga motabok sa 1,000 ang aktibong mga kaso sa coronavirus disease sa Dakbayan sa Sugbo kay gikan sa 50 nga average kada adlaw, nisaka na kini ngadto sa 80. Naa gani usa ka adlaw nga niabot og 97.
Apan bisan pa niini, naa gihapoy mga netizen o ordinaryong mga tawo nga nagtuo nga kini drama aron makapanguwarta ang kagamhanan. Daghan pang nangasuko nga ang mga pulis nag estrikto sa pagpatuman sa curfew gikan sa alas 11 sa gabii hangtod sa alas 5 sa buntag. Gusto pa gani sa pulis nga mas sayo, alas 10 na sa gabii magsugod ang curfew.
Kinsa bay di mabalaka nga ingon sa mibalik sa uno ang gidaghanon sa mga kaso sa Covid. Niadto ra bang sayong bahin sa Mayo 2020, nitabok ang siyudad sa 1,000 ka mga kaso.
Niadtong Agusto, niubos na sa 1,000 ang mga kaso. Apan karon, mag four-digit na sab.
Pait baya huna-hunaon nga duna gihapoy mga tawo nga misakay sa conspiracy theory, nga ang tanan mugna ug nagkunsabo ang naa sa gobiyerno ug mga negusyante aron pagpahimulos sa sitwasyon. Ang pagsaka sa mga kaso wa lang mahitabo dinhi sa Pilipinas. Bisan sa mga nasod sa Europe, mibalik og saka ang gidaghanon sa infections kada adlaw. Sa Britanya, 100,000 na ang nangamatay sa Covid-19.
Kon imong basahon ang mga balita gikan sa ubang mga nasod, makapakitbi sa atay ang gidaghanon sa ilang infections tungod kay daghan usab sa ilang mga lumolupyo di motuo kon unsa kini ka mananakod ug makapatay niadtong huyang sa immune system.
Kon motuo ang kinabag-an aning teyoriya nga kining tanan mugna mugna lang nga estorya, dako ang posibilidad nga ang nahitabo niadtong Hunyo ngadto sa Hulyo mas mograbe pa kay daghan ang nagkompyansa na.
Kanus-a ba kita makakat-on og leksyon, kanang di na kita makabangon tungod lang sa sayop nga pagtuo?