Gimandoan ni Talisay City Mayor Gerald Anthony Gullas ang pangulo sa City Agriculture’s Office nga susihon ang rason kon nganong misaka ang presyo sa karneng baboy ug manok sa kamerkadohan sa dakbayan.
Si Gullas gustong masayod kon unsay rason sa pagsaka sa presyo human sa daghang reklamo nga inadawat sa iyang buhatan.
Kaniadto makapalit sa tag P220 ang kilo sa karneng baboy samtang sa manok, tag P160 ang presyo, lakip na ang karneng baka nga anaa sa tag P280 ang matag kilo.
Apan karon, gikataho nga misaka ang karne sa baboy ngadto sa P260 hangtud na sa P270 ug manok tag P90 hangtod na sa P210.
Ang karne sa baka naa na sa tag P300 ngadto sa P320 ang matag kilo.
Ubay-ubay nga mga lugar sa nasud labin sa Mindanao, Luzon ug Leyte sa Region 8 nga dunay nasigpatan nga nasudlan og African Swine Fever (ASF) ang mga karne sa ilang lugar nga gidudahan hinungdan sa pagsaka sa presyo. (BBT)