Padayon nga naa lang sa balay magtrabaho si Cebu City Mayor Edgardo Labella, apan di na grabe ang iyang ear infection nga nasinati itandi sa mga kapin sa usa ka semana na ang nakalabay.
“The worst is over. It has been controlled and I was advised to stay home for a while,” matod ni Labella sa press conference sa Miyerkules, Enero 27, 2021.
Ang mayor padayon nga nagpaalim sa iyang ear infection sa ilang balay sa Barangay Mabolo subay sa rekomendayon sa iyang mga doctor.
Si Labella nagkanayon nga padayon pa siyang nagtumar og antibiotics ug gidid-an una siyang motipon sa daghang mga tawo.
Kini ang gitumbok sa mga mananambal nga usa sa hinungdan sa pagkadaot sa iyang tuo nga dunggan.
“The most important advice that my doctors told me, never, never expose yourself first, to crowded places because according to them, that really is the cause of the infection,” paghulagway sa mayor.
Ang mayor nagpasalamat ngadto kang Bise Mayor Michael Rama ug Konsehal Dondon Hontiveros, kinsa maoy acting mayor ug vice mayor dihang didto pa sa ospital sa Labella sa miaging semana para magpatambal.
Ang pagka-ospital sa mayor maoy iyang ikaduha human siya naoperahan para makuha ang bato sa iyang gall bladder sa unang semana sa Septiyembre sa miaging tuig.
Nagpasalamat ang mayor sa mga Sugbuanon kinsa nipaambit sa ilang mga pag-ampo para sa iyang kaayohan. (PAC)