TULO ka mga sakop sa duha ka mga criminal group nadakpan sa buwag nga operasyon sa Regional Intelligence Unit (RIU) ug Danao City Police Station sa Dakbayan sa Danao sa Miyerkules, Enero 27, 2021.
Nadakpan pinasikad sa mga warrant of arrest sa nagkadaiyang mga kaso giilang sila si Jason Asister, 29, taga sityo San Roque, Barangay Taytay, Dakbayan sa Danao; Jerald Gonzaga, 23, taga Barangay Looc; ug Frank Vincent Aguilar, taga Barangay Maslog.
Matod ni Police Lt. Colonel Ricky Delilis, hepe sa RIU 7, nga si Asister sakop sa King gun running syndicate nga naglihok sa amihanang Sugbo.
Samtang sila si Gonzaga ug Aguilar mga sakop sa Alvaro drug syndicate.
Si Asister maoy ikasiyam nga most wanted sa Dakbayan sa Danao nga nag-atubang sa kasong frustrated homicide.
Si Gonzaga mao ang no. 7 most wanted ug nag-atubang og kasong rape.
Ang tulo gibalhug sa Danao City Police Station samtang wa pa mapresentar sa korte nga ningluwat sa mga warrant of arrest. (BBT)