ALANG sa Siyudad sa Sugbo, mga negusyante ug kapulisan, wa kinahanglana nga ang dakbayan ipailawom sa general community quarantine (GCQ) bisan pa sa kada adlaw nga pagsaka sa gidaghanon sa coronavirus disease (Covid-19).
Ang Dakbayan sa Sugbo usa sa lima ka mga dapit sa nasod nga dunay labing taas nga mga kaso sa Covid infections sa nasod. Ubos kini sa modified general community quarantine (MGCQ), labing ubos sa quarantine level, sugod sa Septiyembre 1, 2020 hangtod sa Enero 31, 2021.
Alang kang Cebu City Mayor Edgardo Labella nga wa kinahanglana nga ang siyudad ibalik ngadto sa GCQ. Nipasabot si Labella nga bisan ubos sa MGCQ ang siyudad, naa gihapon ang quarantine passes, pagdili sa mga menor ubos sa 15 anyos ug senior citizens nga 65 anyos pataas ug pagdili sa panagtapok.
Estrikto kining gipatuman nga susama og ang Cebu City naa gihapon sa GCQ. “I don’t see any reason yet to go back to GCQ,” matod ni Labella sa iyang virtual press conference sa Enero 27, 2021.
Bisan si Police Regional Office 7 Director Brigadier General Ronnie Montejo wa makakita sa panginahanglan nga ipaubos ang siyudad sa GCQ.
Alang kaniya duna pay kapabilidad ang Siyudad sa pagpugong nga di makasakag maayo ang mga kaso sa Covid-19.
Matod niya nga isip sakop sa Regional Inter-Agency Task Force (RIATF), di siya morekomendar niini.
Husto ra ang gihimo karon sa Emergency Operation Center (EOC) nga ang nag positibo sa Covid lang ang gipangbalhin sa isolation facilities ug ang ilang panimay maoy gi lockdown.
“Pero as a whole, kanang imong pasabot i-lockdown, murag tan-aw nako dili pa siya advisable sa pagkakaron kay manageable man,” matod ni Montejo.
Kon ang siyudad ipaubos sa GCQ, dunay mga negusyo nga sirhan og balik tungod sa limitasyon sa mga industriya nga makabukas.
Alang kang Cebu Chamber of Commerce and Industry (CCCI) president Felix Taguiam nga di maayo nga duna na say mga negusyo nga manira.
Madaut na usab ang mga negusyo, matod ni Taguiam. Apan nabalaka sila sa double-digit nga pagsaka sa mga kaso sa Covid-19.
“We, in the business sector, are much concerned with the double digit rise. We are constantly reminding our members not to forget all the basic work safe protocols,” sulti niya sa SunStar Cebu.
Samtang si Labella nagtuon pa kon kinahanglan bang iirog ang sugod sa curfew hour, gikan sa alas 11 ngadto na sa alas 10 sa gabii sumala sa rekomendasyon sa CCPO. Iya ning gitun-an kay makadaut kini sa ubang mga negusyo. (dugang taho ni JJL, JOB)