Usa ka non-working special holiday alang sa mga taga Consolacion ang Pebrero 6, Sabado, subay sa kasumaran sa pagkalungsod niini ubos sa Lalawigan sa Sugbo.
Kini maoy gipahibaw ni Consolacion Mayor Joanes Alegado subay sa Proclamation No. 1082 nga gi aprubahan ni Presidente Rodrigo Duterte pinaagi ni Executive Secretary Salvador Medialdea.
Subay sa pagtugot, gikinahanglan nga mosubay sa estriktong health protocols pagpanalipod sa pagkatap sa coronavirus disease sa lungsod.
Gibutyag ni Alegado nga nahan-ay na ang mga kalihokan alang sa pagsaulog sa ika-101 nga Founding Anniversary sa lungsod.
Matod sa mayor nga simple lang nga kalihokan ang ipahigayon diin sagad ipaagi sa virtual aron mapatuman ang health protocols.
Sa Pebrero 2, sugdan ang selebrasyon pinaagi sa pagpahigayon og municipal-wide tree planting sapiniling mga empleyado, uban ang mga opisyal sa tanang mga barangay sa lungsod.
Tapuson kini pinaagi sa pagpasidungog kang Gov. Francis Burton Harrison sa Pebrero 6.
Nalakip sa mga kalihokan mao ang indigay sa Spoken Word Poetry, Sarok Festival King and Queen Costume Exhibit ug uban pa.
Tungod sa padayon nga hulga sa Covid-19, giawhag ni Alegado ang mga konstituente nga padayunon ang pagsunod sa protocols.
“Padayon ta sa atong mga routine, padayon ta sa atong mga pangandoy. Let us continue to aspire for it, and work for it but let’s do it safely. We can never be complacent in terms of our safety and security,” matod ni Alegado pinaagi sa information office niini.
Ang lungsod sa Consolacion nakatala og 28 ka mga aktibong kaso sa Covid-19 ning bag-o, 630 na ang naka-recover sa kinatibuk-an nga 696, diin 38 ang nangamatay. (ANV)