Sugod karong Pebrero 1, 2021, ibalik pagpatuman sa Kagamhanan sa Dakbayan sa Talisay ang schedule sa pagpamalit sa bisan asa nga mga merkado, publiko ug pribado, apil na niini ang malls.
Si Talisay City Mayor Gerald Anthony “Samsam” Gullas niluwat og memorandum sa hugot nga pagpatuman sa market schedules sibo tungod sa nagsaka nga mga kaso sa coronavirus disease (Covid-19).
Sa iyang memorandum nga gipetsahan og Enero 28, 2021, iyang gimandoan ang kapulisan, City of Talisay Traffic Operations and Development Authority (CT-TODA), market officials ug uban pa sa hugot nga pagpatuman sa iyang Executive No. 28 nga nagdeklarar sa Talisay ubos modified general community quarantine (MGCQ).
Gawas sa quarantine pass, gikinahanglan nga ang mamalitay dunay ipresentar nga identification (ID) card.
Sa Lunes, Miyerkules ug Biyernes, mga barangay nga mahimong makapangompra mao ang Lagtang, San Roque, Cansojong, Tanke, Lawaan 3, Linao, Biasong, Lawaan 2, Candulawan, Jaclupan ug Tapul.
Sa Martes, Huwebes ug Sabado, makapangompra ang mga taga Bulacao, Tabunok, Dumlog, San Isidro, Poblacion, Maghaway, Lawaan 1, Mohon, Pooc, Manipis ug Campo 4.
Sa Dominggo, mahimong makapamalit ang tanan.
Mahimo usab nga makasulod ang si bisan kinsa sa mga botika, money transfer ug kanan-anan nga giisip nga essentials.
Sa Enero 27,2021, ang dakbayan dunay bag-ong 13 ka aktibong mga kaso nga naghatod ngadto sa aktibong mga kaso sa 79.
Ang Barangay Linao maoy dunay labing daghang aktibong mga kaso nga niabot og 12.
Ang Talisay dunay 1,161 ka mga kaso sa Covid-19, 979 naka recover na samtang 103 ang nangamatay. (REV)